انٹرنیشنل کرکٹ کونسل (آئی سی سی) ون ڈے ورلڈکپ 2023 میں پاکستانی ٹیم اپنا اگلا اور فیصلہ کن میچ آج جنوبی افریقا کے خلاف کھیلے گی، میچ کے دوران ہلکی بارش کی پیشگوئی کی گئی ہے۔
بھارت کی میزبانی میں جاری آئی سی سی ون ڈے ورلڈکپ کے 13 ویں ایڈیشن میں آج پاکستان اور جنوبی افریقا کی ٹیمیں مدمقابل آئیں گی۔ دونوں ٹیمیں چنئی کے ایم اے چدمبرم اسٹیڈیم کے میدان میں جیت کیلئے جان کی بازی لگائیں گی۔
آئی سی سی ورلڈکپ کے اس فیصلہ کن میچ سے قبل چنئی کے کچھ علاقوں میں بادل برسنے کی ویڈیو سامنے آئی۔ سوشل میڈیا پر سامنے آنی والی ویڈیو میں چنئی شہر میں تیز بارش کا منظر ریکارڈ کیا گیا ہے۔
Rain in some parts of Chennai, though it stopper after few minutes. Hope it doesn't affect the game today. pic.twitter.com/Sp9Ht4Buqa
— Faizan Lakhani (@faizanlakhani) October 27, 2023
اس حوالے سے چنئی میں موجود نمائندہ ہم نیوز نے بتایا ہے کہ صبح تک بارش کی امید نہیں تھی اور درجہ حرارت بھی 30 ڈگری سینٹی گریڈ رہنے کا امکان ظاہر کیا گیا تھا۔ اس وقت چنئی کے چدمبرم اسٹیڈیم کو گہرے بادلوں نے گھیرا ہوا ہے۔
نمائندہ ہم نیوز نے مزید بتایا کہ مقامی لوگوں کے مطابق بارش اگر ہوئی تو زیادہ دیر جاری نہیں رہے گی۔ چنئی میں بادلوں کے ساتھ سورج کی آنکھ مچولی بھی جاری ہے جس کی وجہ سے مکمل میچ دیکھنے کی توقع کی جارہی ہے۔