اسلام آباد: وزیر اعظم شہباز شریف نے کہا ہے کہ معزز سپریم کورٹ کے فیصلے نے عمران خان اینڈ کمپنی کے جھوٹ کو بےنقاب کر دیا ہے۔
وزیر اعظم شہباز شریف نے سماجی رابطے کی ویب سائٹ ٹوئٹر پر لکھا کہ انتہائی شرمناک ہے کہ کس طرح عمران خان نے آئین کو مجروح کرنے کی کوشش کی اور شرمناک ہے کہ عمران خان نے “حکومت کی تبدیلی” کا جھوٹ تیار کیا۔
یہ بھی پڑھیں: عدالتی فیصلے نے بیرونی سازش کے بیانیہ میں آخری کیل ٹھونک دی، اعظم نذیر
انہوں نے کہا کہ عدالت نے عمران اینڈ کمپنی کے پروپیگنڈے کو بے نقاب کیا اور سپریم کورٹ کا یہ فیصلہ سب کے لیے پڑھنا ضروری ہے۔
عدم اعتماد کے معاملے پر معزز سپریم کورٹ کے تفصیلی فیصلے نے عمران خان کے جھوٹ اور پروپیگنڈے کو بے نقاب کر دیاہے۔ عمران خان نے آئین شکنی کرتے ہوئے حکومت کی تبدیلی کو جس طرح سازشی بیانے کا رنگ دینے کے لئےجھوٹ گھڑا، وہ انتہائی قابل شرم ہے۔ سب کو عدالت کا یہ فیصلہ ضرور پڑھنا چاہئے۔
— Shehbaz Sharif (@CMShehbaz) July 14, 2022
واضح رہے کہ گزشتہ روز سپریم کورٹ نے ڈپٹی اسپیکر کی رولنگ کے خلاف ازخود نوٹس کا تفصیلی فیصلہ جاری کیا۔
سپریم کورٹ کے اکثریتی فیصلے میں لکھا گیا کہ ڈپٹی اسپیکر کا تحریک عدم اعتماد مسترد کرنے کا فیصلہ غیر آئینی ہے اور اسمبلیاں تحلیل کرنے کا حکم غیر قانونی قرار دیتے ہوئے کالعدم قرار دیا جاتا ہے۔
چیف جسٹس عمر عطا بندیال کے تحریر کردہ فیصلے میں کہا گیا ہے کہ بیرونی سازش سے متعلق کوئی انکوائری یا تحقیق نہیں کرائی گئی، سفارتی مراسلے سے متعلق فیصلہ کرنا ایگزیکٹیو کا کام ہے۔
