سنسی خیز فتح، قلندرز نے کنگز کو ہرا دیا

March 12, 2018
نازش حسن

دبئی: پاکستان سپر لیگ تھری کے 24ویں میچ میں لاہور قلندرز نے کراچی کنگز کو سپر اوور میں سنسنی خیز مقابلے کے بعد شکست دے کر ایونٹ کی دوسری کامیابی اپنے نام کر لی۔

اننگ کے آخری اوور کی آخری گیند پر سہیل اختر آؤٹ ہوئے تو امپائر نے نو بال کا اشارہ دے دیا۔ قلندرز کو جیت کے لیے ایک گیند پر تین رنز درکار تھے۔

امپائر کی طرف سے دی گئی فری ہٹ پر ایک ہی رن بن سکا۔

گیم میں اس وقت زبردست موڑ آیا جب آخری بال پر گلریز صدف  اسکور برابر کرنے کے بعد دوسرا رن لینے کی کوشش میں آؤٹ ہوگئے۔

اسکور برابر ہونے پر دونوں ٹیموں کے سپر اوور دیا گیا۔ تھرل سے بھرپور سپر اوور میں لاہور قلندر نے پہلے بیٹنگ کرتے ہوئے 11 رنز بنائے۔

جواب میں کراچی کی ٹیم سنیل نارائن کی نپی تلی بالنگ نہ سمجھ سکی۔ کنگز نے ایک وکٹ کے نقصان پر آٹھ رنزہی بنائے۔

دبئی انٹرنیشنل کرکٹ اسٹیڈیم میں کھیلے گئے میچ میں کراچی کنگز نے قلندرز کی دعوت پر پہلے کھیلتے ہوئے مقررہ 20 اوورز میں پانچ وکٹوں کے نقصان پر 163 رنز بنائے۔

جواب میں قلندرز کی ٹیم میدان میں آئی تو مقررہ 20 اوورز میں آٹھ وکٹوں کے نقصان پر 163 رنز بناسکی۔

آغاز میں کراچی کے 163 رنز کے ہدف کے تعاقب میں لاہور قلندرز کے اوپنرز اینٹن ڈیوسیچ اور فخر زمان میدان میں آئے اور جارحانہ بیٹنگ کرتے ہوئے پہلی وکٹ کی شراکت میں 26 رنز بنائے۔

ڈیوسیچ آؤٹ ہوئے تو ان کا انفرادی اسکور 14 گیندوں پر 24 تھا۔

فخر زمان نے نئے آنے والے کھلاڑی آغا سلمان کے ساتھ مل کر بیٹنگ جاری رکھی۔ فخر 28 رنز بنا کر عماد وسیم کی گیند پر کولن انگرام کو کیچ تھما بیٹھے۔

دوسری وکٹ پر قلندرز کا مجموعی اسکور 89 تھا اور میکلم الیون کو جیت کے لیے مزید 75 رنز درکار تھے۔

آغا سلمان نے ذمہ دارانہ بیٹنگ کا مظاہرہ کرتے ہوئے سنیل نارائن کے ساتھ مل کر اسکورآگے بڑھایا۔ سنیل نارائن 103 کے مجموعے پر آؤٹ ہوئے۔

برینڈن میکلم میدان میں آئے اور چوتھی وکٹ کی شراکت میں اسکور کو 136 تک پہنچا دیا۔ اس دوران سلمان آغا نے اپنی نصف سنچری مکمل کی۔

انہوں نے 44 گیندوں کا سامنا کرتے ہوئے ایک چھکے اور چار چوکوں کی مدد سے 50 رنز مکمل کیے۔

نصف سنچری مکمل کرتے ہی سلمان گیند کو باؤنڈری سے پار کرنے کی کوشش میں بابر اعظم اور لینڈل سیمنز کے ہاتھوں کیچ آؤٹ ہو گئے۔

برینڈن میکلم نے اگلی ہی گیند پر سیمنز کو کیچ تھمایا اور میدان سے باہر کی راہ لی۔

کپتان آؤٹ ہوئے تو ٹیم کا مجموعی اسکور پانچ وکٹوں کے نقصان پر 140 تھا اور قلندرز کو جیت کے لیے دو اوورز میں 24 رنز درکار تھے۔

قلندرز کی جانب سے چھٹی وکٹ سہیل خان کی گری۔ وہ کوئی رن نہیں بنا سکے۔

قلندرز کی ساتویں وکٹ مچل میکلنگن کی گری تو ٹیم کا اسکور 19.4 اوورز میں 160 تھا۔ ٹیم کو دو گیندوں پر چار رنز درکار تھے۔

اننگ کے آخری اوور میں عثمان خان کی گیند پر سہیل اختر اس وقت کیچ آؤٹ ہو گئے جب ٹیم کو جیت کے لیے صرف تین رن درکار تھے۔ سہیل خان میدان سے باہر جا رہے تھے جب امپائر نے عثمان خان کی گیند کو نو بال قرار دے دیا۔

قلندرز کی قسمت نے نو بال ملنے پر بھی ساتھ نہ دیا۔ بلے باز گلریز صدف دوسرا رن لینے کی کوشش میں آخری گیند پر اسکور برابر کرنے کے بعد آؤٹ ہوگئے۔

اس سے پہلے 24ویں میچ میں کراچی کنگز نے لاہور قلندرز کو جیت کے لیے 164رنز کا ہدف دیا ہے۔

دبئی انٹرنیشنل کرکٹ اسٹیڈیم میں کھیلے گئے میچ میں قلندرز نے ٹاس جیت کر کنگز کو پہلے بیٹنگ کی دعوت دی۔

کنگز نے پہلے بیٹنگ کرتے ہوئے مقررہ 20 اوورز میں پانچ وکٹوں کے نقصان پر 163 رنز بنائے۔

میچ کے آغاز میں کنگز کی جانب سے لینڈل سیمنز اور جو ڈینلے اوپننگ کے لیے میدان میں آئے۔ اوپنر بلے باز پہلی وکٹ کے لیے 19 رنز کی پارٹنرشپ قائم کر سکے۔

جو ڈینلے کراچی کی جانب سے آؤٹ ہونے والے پہلے کھلاڑی تھے۔ انہوں نے چار گیندوں کا سامنا کرتے ہوئے صرف تین رنز بنائے اور سہیل خان کی گیند پر مچل میکلنگن کے ہاتھوں کیچ آؤٹ ہوئے۔

لینڈل سیمنز نے نئے آنے والے کھلاڑی بابر اعظم کے ساتھ مل کر اسکور کو 91 رنز تک پہنچایا۔ سیمنز نے اس دوران شاندار نصف سنچری مکمل کی۔

انہوں نے 39 گیندوں کا سامنا کرتے ہوئے 55 رنز بنائے۔ انہوں نے ایک چھکے اور آٹھ چوکوں کی مدد سے اپنی اننگ مکمل کی اور یاسر شاہ کی گیند پر کپتان میکلم کو کیچ دے کر آؤٹ ہو گئے۔

بابر اعظم نے کولن انگرام کے ساتھ مل کر مزاحمت کی کوشش کی اور 42 گیندوں کا سامنا کرتے ہوئے ٹورنامنٹ کی مسلسل تیسری نصف سنچری مکمل کی۔

چار رنز کے انفرادی اسکور پر کولن انگرام کا آسان کیچ ڈراپ ہوا۔ تاہم کنگز بلے باز دوسرے موقع کا استعمال نہ کر سکے اور 13 گیندوں کا سامنا کرتے ہوئے 12 رنز بنا کر پویلین لوٹ گئے۔ انہیں سہیل خان کی گیند پر گلریز صدف نے کیچ آؤٹ کیا۔

بابر اعظم آؤٹ ہوئے تو ٹیم کا ٹوٹل اسکور 147 تھا۔ بابر اعظم 61  بنا کر آؤٹ ہوئے۔ انہوں نے ایک چھکے اور چھ چوکوں کی مدد سے 49 گیندوں کا سامنا کرتے ہوئے اپنی اننگ مکمل کی۔

شاہد آفریدی میدان میں آئے تو سابقہ روایت کو برقرار رکھتے ہوئے چھکے سے اننگ کا آغاز کیا۔ آفریدی دوسری ہی گیند پر چھ رنز بنا کر شاہین آفریدی کی گیند کا شکار بن گئے۔

قلندرز کی جانب سے سہیل خان نے تین کھلاڑیوں کو پویلین کی راہ دکھائی۔

پی ایس ایل تھری کا 25واں میچ 13مارچ (منگل) کو ملتان سلطانز اور اسلام آباد یونائیٹڈ کے مابین کھیلا جائے گا۔ ایونٹ کے ٹاپ فور میں شامل دونوں ٹیمیں شارجہ کرکٹ گراؤنڈ میں مد مقابل ہوں گی۔


ٹیگز :
متعلقہ خبریں
آئی ایم ایف

بجٹ 2024-25، آئی ایم ایف معاون ٹیم پاکستان پہنچ گئی
وزیراعلیٰ

پنجاب سیاہ دور سے ترقی کی طرف گامزن، آج تک ایک شکایت بھی نہیں ملی، وزیراعلیٰ
ملٹری اعزازات pak army

کراچی میں فوجی افسروں اور جوانوں کو ملٹری اعزازات سے نوازا گیا