پشاور:علماء کرام نے انسداد پولیومہم کی حمایت کرنے کا فیصلہ کر لیا ہے.
اس ضمن میں وزیراعظم کے ترجمان برائے انسداد پولیو بابر بن عطا نے مفتی لئیق کو پولیو کے قطرے پلائے۔
اس موقع پر ترجمان وزیراعظم نے علماء کرام کی حمایت کا شکریہ ادا کرتے ہوئے کہا کہ پولیو کے خلاف جنگ میں بہت بڑی کامیابی حاصل ہوئی ہے۔
انہوں نے اپنے ایک ٹویٹ پیغام میں بتایا کہ آٹھ سال کی شدید مخالفت کے بعد پہلی مرتبہ شورٰی اہل حدیث کے مفتی لئیق احمد نے پولیو کے قطروں کی مخالفت ترک کرنے کا فیصلہ کیا ہے۔
انہوں نے کہا کہ اس حمایت کے بعد ہزاروں انکاری والدین بھی پولیو کے قطروں کے قائل ہو جائیں گے.
Peshawar: Massive Victory in the Fight aginst Polio: After 8 years of staunch opposition to polio vaccine. Mufti Laeeq Ahmed of Ahle-Hadith Shura decided to support the Programme. This will give us a big boost in reaching thousands of children missed due to religious refusals. pic.twitter.com/SdbbdVthKc
— Babar Atta (@babarbinatta) February 10, 2019
واضح رہے حکومت کی جانب سے ملک بھر میں پولیو کے خاتمے کے لیے اقدامات کیے جا رہے ہیں اور اس سلسلے میں آگاہی مہم بھی جاری ہے۔
گزشتہ دنوں سوشل میڈیا پر پولیو ورکرز کی برفباری کے دوران پولیو مہم جاری رکھنے کی ویڈیو وائرل ہوئی تھی جس کے بعد ملک بھر سے پولیو ورکرز کی کاوشوں کو سراہنے کا سلسلہ شروع ہوگیا تھا جبکہ وزیراعظم عمران خان نے سوات کی برف پوش پہاڑیوں میں خدمات سرانجام دینے والے پولیو ورکرز سے ملاقات بھی کی تھی۔
سماجی رابطے کی ویب سائٹ ٹوئٹر پر وزیراعظم عمران خان اور پولیو ورکرز کی تصاویر شیئر کی گئیں۔
وزیراعظم عمران خان نے پولیو ورکرز کو جان فشانی کے ساتھ خون جما دینے والی سردی اور برف باری کے باوجود فرض شناسی کے مثال بننے پر زبردست خراج تحسین پیش کیا۔
اس موقع پر وزیراعظم نے پولیو سے ملک کو پاک کرنے کی حکمت عملی پر پولیو ورکرز سے بات چیت کی تھی جبکہ فوکل پرسن بابر بن عطا اور وفاقی وزیر عامر کیانی بھی ملاقات میں موجود تھے۔
