اسلام آباد: وفاقی وزیر برائے اطلاعات و نشریات فواد چوہدری نے کہا ہے کہ اصغر خان کیس پر سپریم کورٹ کا بینچ بننا خوش آئند ہے۔
انہوں نے ٹویٹ کیا ہے کہ وزیراعظم ایف آئی اے کو اصغر خان کیس پر من و عن عملدرآمد کی ہدایت کر چکے ہیں۔ وفاقی وزیر نے کہا ہے کہ اصغر خان کیس مسلم لیگ ن کے سیاسی کرتوت عیاں کرتا ہے اور دلچسپ امر یہ ہے کہ بےنظیر شہید کے سیاسی وارث ن لیگ کی گود میں بیٹھے ہیں۔
اصغر خان کیس پر سپریم کورٹ کا بنچ خوش آئندہے، وزیر اعظم پہلے ہی FIA کو ہدایات جاری کر چکے ہیں کہ کیس میں سپریم کورٹ کے فیصلے پر من وعن عمل کیا جائے یہ مقدمہ نون لیگ کے سیاسی کردار کو عیاں کرتا ہے دلچسپ امر یہ ہے کہ بے نظیر بھٹو شہید کے سیاسی وارث آج نواز لیگ کی گود میں بیٹھے ہیں
— Ch Fawad Hussain (@fawadchaudhry) February 9, 2019
یاد رہے کہ سپریم کورٹ آف پاکستان نے اصغر خان عملدرآمد کیس سماعت کیلئے مقرر کر دیا ہے۔ جسٹس گلزار احمد کی سربراہی میں تین رکنی بنچ 11 فروری کو کیس کی سماعت کرے گا۔ عدالت کی جانب سے اٹارنی جنرل اور ڈی جی ایف آئی اے سمیت دیگر فریقین کو بھی نوٹس جاری کر دیے گئے ہیں۔
وفاقی تحقیقاتی ایجنسی(ایف آئی اے) نے سپریم کورٹ سے کیس بند کرنے کی استدعا کی تھی لیکن عدالت عظمیٰ نے اپنے فیصلے میں کہا تھا کہ ایف آئی اے سیاستدانوں میں رقوم تقسیم کرنے کا کیس ختم کرنے پر عدالت مطمئن نہیں کر سکی اور عدالت یہ سمجھتی ہے کہ کچھ معاملات میں تفتیش کا دائرہ کار بڑھایا جائے، اس کے لیے متعلقہ مواد حاصل کرکے کیس کو آگے لے جایا جاسکتا ہے۔
سپریم کورٹ آف پاکستان نے 11 جنوری 2018 کو اصغر خان کیس ختم نہ کرنے کا فیصلہ سنایا تھا اور ریمارکس دیے تھے کہ عدالت وفاقی تحقیقاتی ایجنسی( ایف آئی اے) کےاخذ کیے گئے نتائج اور وجوہات سے مطمئن نہیں۔