اسلام آباد: وزیراعظم عمران خان نے ٹرمپ کے حالیہ ٹویٹ کے جواب میں کہا ہے کہ امریکہ کی جنگ لڑتے لڑتے پاکستان نے اپنا کافی نقصان کرلیا ہے۔ اب ہم صرف وہی کریں گے جو عوام اور ملک کے حق میں ہے۔
Trump’s false assertions add insult to the injury Pak has suffered in US WoT in terms of lives lost & destabilised & economic costs. He needs to be informed abt historical facts. Pak has suffered enough fighting US’s war. Now we will do what is best for our people & our interests
— Imran Khan (@ImranKhanPTI) November 19, 2018
اس سے قبل وزیراعظم عمران خان نے گزشتہ روز ٹرمپ کی جانب سے دیئے گئے پاکستان مخالف بیان پر کہا تھا کہ صدر ٹرمپ کو پاکستان سے متعلق ریکارڈ درست کرنے کی ضرورت ہے۔ نائن الیون حملوں میں کوئی پاکستانی ملوث نہیں تھا جبکہ پاکستان نے دہشت گردی کےخلاف امریکہ کی جنگ میں ساتھ دیا اور 75 ہزار جانیں قربان کیں۔
کیا ٹرمپ کسی اور اتحادی کا نام لے سکتے ہیں جس نے اس نوعیت کی قربانیاں پیش کی ہوں؟
اپنی ناکامیوں کا الزام پاکستان کے سرتھوپنے کی بجائے امریکہ کو تجزیہ کرنا چاہئیے کہ 140،000 ناٹو، اڑھائی لاکھ افغان فوجیوں اور ایک کھرب ڈالرز کے اخراجات کے باوجود طالبان پہلے سے توانا کیوں ہیں؟ https://t.co/E3Rk9Z8EvK
— Imran Khan (@ImranKhanPTI) November 19, 2018
انہوں نے ٹرمپ کے بیان پر سخت ردعمل کا اظہار کرتے ہوئے کہا کہ دہشت گردی کے خلاف جنگ میں پاکستانی معیشت کو 123 ارب ڈالر کا نقصان اٹھانا پڑا جبکہ ملنے والی 20 ارب ڈالرکی امداد اس نقصان کے مقابلے میں نا ہونے کے برابر ہے۔
ان کا کہنا تھا کہ پاکستان کے قبائلی علاقے وسیع پیمانے پر متاثر ہوئے اور لاکھوں افراد بے گھر ہوئے۔ دہشت گردی کے خلاف جنگ نے عام پاکستانی کی زندگی کو بری طرح متاثر کیا۔
وزیراعظم کا کہنا تھا کہ امریکہ کو پاکستان آج بھی زمینی و فضائی راستے کی سہولت مفت دے رہا ہے۔ صدر ٹرمپ بتا سکتے ہیں کہ کسی دوسرے اتحادی نے اتنی قربانی دی ہو۔ پاکستان کو قربانی کا بکرا بنانے کی بجائے امریکہ اپنی ناکامی کا خود جائزہ لے۔
ان کا کہنا تھا کہ اس وقت ایک لاکھ 40 ہزار نیٹو، اڑھائی لاکھ افغان فوج افغانستان میں موجود ہے جبکہ اب تک امریکہ افغان جنگ میں مبینہ طور پر ایک کھرب ڈالر جھونک چکا ہے اس کے باوجود افغانستان میں دہشت گرد پہلے سے زیادہ طاقت ہو گئے ہیں۔
واضح رہے گزشتہ روز امریکی صدر نے پاکستان کے خلاف بیان دیتے ہوئے کہا تھا کہ ہم پاکستان کو امداد دیتے رہے اور اس نے ہمارے لیے کچھ نہیں کیا۔