کیا مشہورزمانہ فیشن ڈول ’باربی‘ بوڑھی ہوگئی ہے؟ جی نہیں باربی ڈول بوڑھی نہیں ہوئی بلکہ دنیا بھرکے کروڑوں بچوں کی پسندیدہ گڑیا آج اپنی 60 ویں سالگرہ منا رہی ہے ۔باربی ڈول کی 60ویں سال گرہ کے موقع پر کمپنی کی جانب سے حقیقی زندگی پر مبنی کرداروں پر مشتمل کلیکشن متعارف کرایا گیاہے، نئی کلیکشن میں ان شعبہ جات کی نشاندہی کی گئی ہے جس میں خواتین ابھی بھی بہت پیچھے ہیں۔
باربی ڈول پہلی بار 9 مارچ، 1959 میں نیویارک میں منعقد ہونے والے ٹوائے فیئر میں متعارف کرائی گئی تھی ۔ 1959سے لیکر آج تک ’’باربی ڈول‘‘ دنیا بھرکی بچیوں کی اولین پسند ہے۔
اس یاد گاردن کو منانے کے لیے باربی ڈول بنانے والی کمپنی میٹل انکارپوریٹ نے اپنی اس شہرہ آفاق پیش کش کے 20 نئے ورژن جاری کیے ہیں جس میں جاپانی ٹینس اسٹار ناؤمی اوسا کا اور برطانوی ماڈل ایڈوا بھی شامل ہیں۔
ڈول بنانے والی کمپنی نے 6 مختلف کیرئرز کی جانب ترغیب دینے والی باربی ڈولز بھی مارکیٹ میں پیش کی ہیں جن میں ابھی تک خواتین کو مناسب یا یکساں نمائندگی حاصل نہیں۔ ایسے کیرئیرز میں میں خلا نورد ، پائلٹ، ایتھلیٹ، صحافی، سیاست دان اور فائر فائٹر باربی ڈول شامل ہیں۔
باربی ڈول اب تک 200 سے زائد کردار وں میں مارکیٹ میں پیش کی جاچکی ہے ۔ ان کرداروں میں سرجن سے لیکر ویڈیو گیم ڈیویلپرتک شامل ہیں۔ باربی کو ماضی میں اس کی جسمانی ساخت اور کپڑوں کی وجہ سے تنقید کا نشانہ بھی بنایا گیا ۔ ناقدین کی طرف سے کہا گیا کہ یہ ایک مخصوص ہئیت کی خواتین کی نمائندگی کرتی ہے۔ اس کے بعد باربی بنانے والی کمپنی نے مختلف طرح کی ڈولز متعارف کرائیں ، جن میں افریقی ، ایشیائی، حجاب پہننے والی باربی ڈولز سے لے کر سائنسدان ڈولز بھی شامل ہیں۔
یہ بھی پڑھیے:آسٹریلوی اداکارہ لائیو ایکشن ری میک میں باربی ڈول کا کردار ادا کریں گی
باربی ڈول اور میٹل انکارپوریٹ ایک امریکی کاروباری خاتون رتھ ہینڈلر کے قوت تخیلہ کا نتیجہ ہے ۔ اب تک دنیا میں ایک ارب سے زائد باربی ڈول فروخت کی جاچکی ہیں۔ باربی سے قبل عموماً گڑیا ، ایک کمسن بچی کی شکل کی ہوا کرتی تھی۔ رتھ کا کہنا ہے کہ ایک جوان لڑکی کو گڑیا بنانے کا خیال انہیں اپنی بیٹی ’باربرا ‘کو کاغذ کی گڑیا بناتے دیکھ کر آیا، جو اپنی گڑیوں کو بڑی لڑکیوں کے کردار دیا کرتی تھی ‘۔
اپنی 60 ویں سالگرہ کے موقع پر باربی کا جو سب سے خصوصی ایڈیشن جاری کیا گیا ہے اس میں باربی ڈول ایک بھڑکیلا قسم کا سلورگاؤن زیب تن کیے نظر آرہی ہے۔
