لاہور: پنجاب کے صوبائی وزیر برائے اطلاعات اور ثقافت فیاض الحسن چوہان کا کہنا ہے کہ آشیانہ ہاؤسنگ اسکینڈل کیس میں سابق پرنسپل سیکریٹری فواد حسن فواد وعدہ معاف گواہ بن گئے ہیں۔
شہباز شریف کو نیب کی جانب سے گرفتار کرنے کے بعد اپنے رد عمل میں صوبائی وزیر کا کہنا تھا کہ آشیانہ اقبال اسکینڈل میں بڑی پیش رفت ہوئی ہے جس کے تحت سابق وفاقی وزیر خواجہ سعدرفیق اور ان کے بھائی اور صوبائی وزیر سلمان رفیق کا نام ایگزٹ کنٹرول لسٹ (ای سی ایل) میں شامل کر دیا گیا ہے۔
ان کا کہنا تھا کہ اب یہ ثابت ہو چکا ہے کہ پیراگون سٹی آشیانہ ہاؤسنگ اسکیم کی بینیفشری ہے۔
صوبائی وزیر اطلاعات کے اس بیان کے بعد پاکستان مسلم لیگ (ن) کی جانب سے شدید رد عمل سامنے آیا تاہم کچھ دیر بعد ہی وفاقی وزیر اطلاعات و نشریات فواد چوہدری نے سماجی رابطے کی ویب سائٹ ٹوئیٹر پر ایک بیان جاری کیا جس میں انہوں نے فیاض الحسن چوہان کے بیان کی تردید کر دی۔
سعد رفیق اور سلمان رفیق کے نام ECL پر لانے کا کوئ فیصلہ نہیں ہوا، اس سلسلے میں خبروں کی تردید کرتے ہیں۔ NAB آزاد ادارہ ہے وفاقی حکومت قانون کے تحت NAB کی معاونت کرے گی، اس سلسلے میں NAB کے فیصلوں پر عمدرآمد ہو گا۔
— Ch Fawad Hussain (@fawadchaudhry) October 5, 2018
فواد چوہدری کا کہنا تھا کہ خواجہ سعد رفیق اور خواجہ سلمان رفیق کے نام ای سی ایل پر لانے کا کوئی فیصلہ نہیں ہوا اور وہ اس سلسلے میں آنے والی خبروں کی تردید کرتے ہیں۔ ان کا مزید کہنا تھا کہ نیب ایک آزاد ادارہ ہے۔
