اسلام آباد: صدارتی انتخاب کے لیے پاکستان تحریک انصاف کے نامزد امیدوار عارف علوی کی درخواست پر پی ٹی آئی رہنما جہانگیر خان ترین اپنا دورہ لندن مختصر کرکے وطن واپس پہنچ گئے ہیں۔
معاملے سے واقف ذرائع کے مطابق عارف علوی نے گزشتہ روز جہانگیر ترین سے رابطہ کیا اور صدارتی انتخاب میں کردار ادا کرنے کی درخواست کی تھی۔
عارف علوی کے رابطہ کرنے پر جہانگیر ترین نے لندن دورہ مختصر کرنے کا فیصلہ کیا اور پہلی دستیاب فلائٹ سے پاکستان پہنچے ہیں۔
جہانگیر ترین نے گیارہویں عام انتخابات کے بعد پاکستان تحریک انصاف کی حکومت سازی میں بھی اہم کردار ادا کیا تھا جس کے بعد وہ 21 اگست کو ایک ماہ کے لیے لندن چلے گئے تھے۔
سپریم کورٹ کی جانب سے نااہل قرار دیے جانے کے بعد پارٹی کی جنرل سیکرٹری شپ سے ہٹائے جانے والے جہانگیر ترین نے اپنے بیرون ملک دورے کا مقصد چھٹیاں بتایا تھا۔
Need to visit all provincial capitals with our team as instructed by @ImranKhanPTI to meet our allies and voters and request for their votes. Have asked @JahangirKTareen who is in UK to join us. I think he ? has had a good vacation?️and now back to work ?
— Dr. Arif Alvi (@ArifAlvi) 26 August 2018
گزشتہ روز ٹوئٹر پر جاری کردہ پیغام میں بھی تحریک انصاف کے صدارتی امیدوار عارف علوی نے تصدیق کی تھی کہ انہوں نے جہانگیر ترین سے وطن واپس آنے کا کہا ہے تاکہ صوبوں میں جا کر رابطے کیے جا سکیں۔
