نگراں وفاقی کابینہ نے سوشل میڈیا مہم چلانے والوں کیخلاف مشتر کہ تحقیقاتی ٹیم (جے آئی ٹی ) بنانے کی منظوری دے دی۔
اس حوالے سے جاری نوٹیفکیشن کے مطابق اعلی سطح کی جے آئی ٹی پانچ ارکان پر مشتمل ہوگی۔ ایڈیشنل ڈائریکٹر جنرل ایف آئی اے جے آئی ٹی کے سر براہ ہوں گے جبکہ جے آئی ٹی میں آئی ایس آئی اور آئی بی کے افسران شامل ہوں گے۔
نوٹیفکیشن کے مطابق گریڈ 20 کے پی ٹی اے اور نادرا کے افسران بھی جے آئی ٹیم میں شامل ہیں۔ ذرائع کا کہنا تھا کہ وزارت داخلہ کی سمری پیر کا بینہ سے سرکولیشن کے ذریعے منظوری لی گئی۔
ذرائع نے بتایا کہ جعلی بیلٹ پیپرز چھاپنے اور پرو پیگنڈے میں ملوث عناصر کیخلاف کارروائی کا فیصلہ کیا گیا ہے۔
ذرائع کا کہنا تھا کہ سوشل میڈیا مذموم مہم کے ذریعے افسران کو بلیک میل اور دباو ڈال کر وفاداری تبدیل کرنے کی کوشش کی گئی۔ بتایا گیا ہے کہ جے آئی ٹی ذمہ داران کا تعین کرکے مقدمات کا اندراج کرے گی۔
جے آئی ٹی مستقبل میں سدباب کے اقدامات کی تجویز بھی کرے گی۔ ذرائع کا کہنا تھا کہ تحقیقات کے دوران آئی ٹی ماہرین کی خدمات حاصل کرنے کی بھی منطوری دی ہے۔
ذرائع کا مزید کہنا تھا کہ سرکاری افسران کیخلاف پروپیگنڈا آئین کے آرٹیکل 5 کی خلاف ورزی ہے۔
