اسلام آباد: وفاقی وزیر اطلاعات مریم اورنگزیب نے کہا ہے کہ پیمرا ترمیمی بل 2023 کا مقصد صحافیوں کی فلاح و بہبود کو بہتر بنانا، پاکستان میں آزاد اور ذمہ دار میڈیا کے ماحول کو فعال کرنا ہے۔
وفاقی وزیر اطلاعات مریم اورنگزیب نے سماجی رابطے کی ویب سائٹ ٹوئٹر پر لکھا کہ قومی اسمبلی کی قائمہ کمیٹی برائے اطلاعات و نشریات نے پیمرا (ترمیمی) بل 2023 منظور کر لیا جس کی مجھے خوشی ہے۔
انہوں نے کہا کہ میں نے گزشتہ روز پیمرا ترمیمی بل 2023 قومی اسمبلی میں پیش کیا تھا۔ کمیٹی کے ارکان کے ساتھ جامع بحث کے بعد کمیٹی نے بل کی منظوری دے دی۔ یہ بل تمام اسٹیک ہولڈرز کے ساتھ مشاورت کے بعد تیار کیا گیا۔ پی ایف یو جے، اے پی این ایس، سی پی این ای سمیت دیگر کے مشوروں کو بھی بل میں شامل کیا گیا۔
یہ بھی پڑھیں: پی ٹی آئی کا کوئی نظریہ نہیں تھا، کہانیاں تھیں جو ہم سنتے تھے، پرویز خٹک نے پنڈورا بکس کھول دیا
مریم اورنگزیب نے کہا کہ بل کا بنیادی مقصد صحافیوں کی فلاح و بہبود کو بہتر بنانا، پاکستان میں آزاد، ذمہ دار میڈیا کو فعال کرنا ہے۔ بل میں صحافیوں کو تنخواہوں کی عدم ادائیگی سمیت دیگر اہم مسائل کا حل پیش کیا گیا ہے۔
انہوں نے کہا کہ بل میں غلط معلومات اور غلط معلومات کی تعریف شامل ہیں۔ اس بل میں مختلف اہم دیرینہ مسائل اور معاملات کا حل بتایا گیا ہے۔
