بنگلہ دیش کی پہلی خواجہ سرا نیوز کاسٹر

بنگلہ دیش  کے ایک نجی ٹی وی چینل نے پہلی مرتبہ ایک خواجہ سرا کو بطور نیوز کاسٹر  متعارف کرایا ہے۔ 

برطانوی نشریاتی ادارے بی بی سی کے مطابق بنگلہ دیش کے نجی ٹی وی چینل “بوشاکھی” نے 29 سالہ خواجہ سرا تشنوا عنان شیشیر کو بطور نیوز اینکر بھرتی کیا ہے، جس کے بعد سوشل میڈیا پر ٹی وی چینل کے اس اقدام کو سراہا گیا ہے۔

رپورٹ کے مطابق گزشتہ روز خواتین کے عالمی دن کے موقع پر تشنوا عنان شیشیر نے نجی ٹی وی چینل پرتین منٹ کا نیوز بلیٹن پیش کیا۔

اس موقع پر گفتگو کرتے ہوئے خواجہ سرا  تشنوا عنان شیشیر نے کہا کہ انہوں نے اپنی زندگی مطالعہ کرنے اور اپنے کیریئر کو آگے بڑھانے کے عزم کے ساتھ گزارا ہے تاکہ وہ اپنا نقطہ نظر پیش کرسکے۔ آج مجھے وہ پلیٹ فارم مل گیا ہے۔

بنگلہ دیش میں خواجہ سراؤں کی آبادی لگ بھگ 15 لاکھ  ہے، جنہیں معاشرے میں امتیازی سلوک اور تشدد کا سامنا کرنا پڑتا ہے۔ بنگلہ دیش میں خواجہ سرا کمیونٹی کے زیادہ تر افراد بھیک مانگنے یا جسم فروشی کے پیشے سے منسلک ہے۔

مزید پڑھیں: پاکستان کا روشن چہرہ بننے والے کچھ کردار

شیشیر کا کہنا ہے کہ نوعمری میں ہی انہیں خواجہ سرا ہونے کا احساس ہوا تھا۔ اس عرصے میں انہیں جنسی ہراسانی کے ساتھ ساتھ ذہنی اذیت بھی برداشت کرنا پڑی۔

بنگلہ دیش کی پہلی خواجہ سرا نیوز کاسٹر کا مزید کہنا ہے کہ ان کی جنس کی وجہ سے ان کے اہلخانہ کو بھی ہراساں کیا گیا جس کے بعد ان کے والد نے بات کرنا چھوڑ دی تھی۔

شیشیر کا کہنا ہے کہ “نامساعد حالات کے باوجود میں نے کبھی اسکول نہیں چھوڑا اور میری چھٹی حس نے ہمیشہ مجھے کہا کہ پڑھتے رہیں۔ اگر میں پڑھائی جاری رکھتی ہوں تو مجھے منزل مل ہی جائے گی”