اسلام آباد: وفاقی وزیر برائے سائنس اینڈ ٹیکنالوجی فواد چوہدری نے کہا ہے کہ ن لیگ نوازشریف کی صحت پر سیاست کرنے کی بجائے گارنٹی کا بندو بست کرے۔
سماجی رابطوں کی ویب سائٹ ٹوئٹر پر انہوں نے لکھا ہے کہ شریف فیملی میں مسلم لیگ کی سربراہی لینے کے لیے جنگ جاری ہے۔
ان کا کہنا تھا کہ نوازشریف سے گارنٹی مانگ کرحکومت نے بہت بڑا قدم اٹھایا ہے کیوں کہ ن لیگی رہنما کی مثال پر آصف زرداری اور کئی دیگر ملزمان بھی سہولت حاصل کرنا چاہیں گے۔
فواد چوہدری نے کہا کہ کوئی مناسب راستہ اختیار کیے بغیر نوازشریف کو ملک سے باہر بھیجنا عملی طور پر ناممکن ہے۔
حکومت نے بہت بڑا قدم اٹھایا ہے شریف فیملی میں مسلم لیگ کی لیڈرشپ کی جنگ جاری ہے لیکن نون لیگ اب نواز شریف کی صحت پر سیاست نہ کرے اور گارنٹی کا بندوبست کرے ،نواز شریف کی مثال آصف زرداری اور کئ دیگر ملزمان بھی حاصل کرنا چاہئں گے بغیر کوئ پراسس اختیار کئے بھیجنا عملی طور پر ناممکن
— Ch Fawad Hussain (@fawadchaudhry) November 13, 2019
خیال رہے کہ وزیراعظم کی زیرصدارت ہونے والے کابینہ کے اجلاس میں نواز شریف کا نام ایگزٹ کنٹرول لسٹ (ای سی ایل) سے نکالنے کی مشروط منظوری دی گئی ہے۔
حکومت پاکستان نے شرط رکھی ہے کہ نوازشریف کو بیرون ملک سفر کرنے کے لیے زرضمانت دینے کے ساتھ واپسی کا وقت بھی بتانا ہوگا۔
سابق وزیراعظم نوازشریف کا نام ایگزٹ کنڑول لسٹ سے نکالنے پر مشاورت کے لیے کابینہ کی ذیلی کمیٹی کے ارکان آج پھر سر جوڑ کر بیٹھیں گے۔
دوسری جانب ن لیگ نے فیصلہ کیا ہے کہ پارٹی ارکان نواز شریف کا نام ایگزٹ کنٹرول لسٹ (ای سی ایل) سے نکالنے والی ذیلی کمیٹی کے اجلاس میں شریک نہیں ہوں گے۔
ن لیگ نے کہا ہے کہ حکومتی شرائط ناقابل قبول ہیں اور حکام نوازشریف کو باہر بھیجنے میں سنجیدہ نہیں ہے۔
