لاہور: چین میں پھنسے پاکستانیوں کا طیارہ لاہور پہنچ گیا ہے، واپس آنے والے 214 مسافروں میں 29 بچے بھی شامل ہیں۔
ذرائع کے مطابق شاہین ائیر لائنز کی پرواز این ایل 891 چین میں پھنسے 214 مسافروں کو لے کر لاہورائیرپورٹ پر اتری جس میں 29 بچوں سمیت 214 افراد شامل تھے۔
یہ مسافر شاہین ایئر لائنز کے طیارے کی عدم دستیابی کے باعث 29 جولائی سے چینی صوبے گوانگ ژو کے ایئرپورٹ میں پھنسے ہوئے تھے۔
سول ایوی ایشن کی نادہندہ ہونے کی وجہ سے پابندی کا شکار شاہین ایئر لائنز کو پاکستانیوں کی جلد واپسی کے لیے خصوصی اجازت دی گئی تھی۔
گزشتہ ہفتے شاہین ایئر لائنز کے جہاز میں فنی خرابی کے باعث پرواز اپنے مقررہ وقت پر روانہ نہیں ہو سکی تھی جس کے باعث مسافر چین میں پھنس گئے تھے تاہم پیر کے روز شاہین ایئر لائنز کی خصوصی پرواز مسافروں کو لے کر واپس وطن پہنچ گئی۔
شاہین ایئرلا ئنز کا اندرون ملک فلائٹ آپریشن سول ایوی ایشن کی نادہندہ ہونے کی وجہ سے دو ماہ سے معطل ہے۔
