اسلام آباد: الیکشن کمیشن نے سندھ کے پانچ ہزار 673 پولنگ اسٹیشنز اور 20 ہزار 165 پولنگ بوتھس حساس ترین قرار دے دیے۔
الیکشن کمیشن نے سندھ کے 65 فیصد پولنگ اسٹیشنز کو حساس ترین قرار دیا ہے، سندھ کے پانچ ہزار 776 پولنگ اسٹیشنز کو حساس قرار دیا گیا ہے جب کہ صرف ضلع خیرپور کے 788 پولنگ اسٹیشنز کے دو ہزار 502 پولنگ بوتھس کو حساس بتایا گیا ہے۔
سندھ میں عام انتخابات کے دوران 29 اضلاع میں سب سے زیادہ حساس ترین ضلع خیرپور کو قرار دیا گیا ہے جبکہ کراچی کے علاقے کورنگی کے 732 پولنگ اسٹیشنز حساس ترین قرار دیے گئے ہیں۔
عام انتخابات 2018 میں ملک بھر کے 20 ہزار 789 پولنگ اسٹیشنز اور 60 ہزار 100 پولنگ بوتھس کو پہلے ہی حساس قرار دیا جا چکا ہے۔
خیبرپختونخوا ( کے پی ) کے سات ہزار تین سو 86 پولنگ اسٹیشنز اور 21 ہزار ایک سو 58 پولنگ بوتھس اور سندھ کے پانچ ہزار سات سو 76 پولنگ اسٹیشنز جبکہ 19 ہزار تین سو 87 پولنگ بوتھس کو حساس ٹھہرایا گیا ہے، ان میں شہری اور دیہی دونوں علاقے شامل ہیں۔
پنجاب میں پانچ ہزار چھ سو 86 پولنگ اسٹیشنز جبکہ 15 ہزار چار سو 66 پولنگ بوتھس اور بلوچستان میں ایک ہزار سات سو 68 پولنگ اسٹیشنز اور تین ہزار پانچ سو 36 پولنگ بوتھس کو حساس قرار دیا گیا ہے۔
دارالحکومت اسلام آباد میں حساس پولنگ اسٹیشنز کی تعداد ایک سو 73 جب کہ حساس پولنگ بوتھس کی تعداد پانچ سو 73 ہے۔
