الیکشن 2024: ریٹرننگ افسران کی تربیت دوبارہ شروع، ملازمین کی چھٹیوں پر پابندی

آئندہ عام انتخابات کے لیے بلوچستان میں ریٹرننگ افسران (آر اوز) اور ڈسٹرکٹ ریٹرننگ افسران (ڈی آر اوز) کی تربیت کا آغاز ہو گیا ہے۔

ترجمان الیکشن کمشنر کے مطابق الیکشن کمیشن آف پاکستان کی زیر نگرانی یہ تربیتی سیشنز کوئٹہ، لورالائی، سبی اور خضدار میں منعقد کیے گئے۔ کوئٹہ میں آر اوز کی تربیت کا عمل مقامی ہوٹل میں شروع ہوا۔

تربیتی سیشنز میں قومی و صوبائی حلقوں کے آر اوز حصہ لے رہے ہیں، ریٹرننگ افسران کی تربیت کا عمل کل بھی جاری رہے گا۔ آر اوز کے بعد منگل کو ڈی آر اوز کی ایک روزہ ٹریننگ ہوگی جو 19 دسمبر تک جاری رہے گی۔

فواد چودھری آزاد حیثیت سے الیکشن لڑیں گے، حبا فواد

ترجمان کا کہنا ہے کہ ووٹوں کے اندراج، اخراج، تبدیلی اور درستی پر پابندی عائد کردی گئی ہے۔ الیکشن کمیشن کے افسران، ملازمین اور ریٹرننگ افسران کی چھٹیوں پر بھی پابندی عائد کردی ہے۔

الیکشن کمیشن کے جاری کردہ نوٹیفکیشن کے مطابق حکومتی و سرکاری اداروں میں ہر قسم کی ٹرانسفر اور پوسٹنگ پر مکمل پابندی ہے۔ کسی بھی ایمرجنسی ٹرانسفر یا پوسٹنگ کیلئے معاملہ الیکشن کمیشن کو بھیجا جائے گا جبکہ پوسٹنگ اور ٹرانسفر کی وجوہات بھی بتانا ہوں گی۔

دوسری طرف ڈی سی اسلام آباد نے بھی بطور ڈسٹرکٹ ریٹرنگ افسر اقدامات کا آغاز کر دیا ہے۔ ڈی سی اسلام آباد نے تعلیمی اداروں میں اسٹاف کی چھٹیوں پر پابندی عائد کردی، عام انتخابات تک کسی بھی سرکاری ملازم کو چھٹی کی اجازت نہیں ہوگی۔