چیف جسٹس عمر عطا بندیال نے کہا ہے کہ ہم سب کچھ اللہ کی رضا اور عوام کی خاطر برداشت کر رہے ہیں، ہم کچھ نہیں کرسکتے لیکن وہ ہستی اپنا کام کرتی ہے۔
چیف جسٹس کی سربراہی میں سپریم کورٹ میں الیکشن کمیشن کی نظر ثانی اپیل پر سماعت کا آغاز ہوا۔ اٹارنی جنرل نے عدالت میں پیش ہوکر دلائل دیتے ہوئے کہا کہ گزشتہ روز کہا تھا الیکشن کمیشن کے اٹھائے گئے نکات پہلے کیوں نہیں اٹھائے تھے۔ ایک صوبے میں انتخابات ہوں تو قومی اسمبلی کا الیکشن متاثر ہونے کا نکتہ اٹھایا گیا تھا۔ اپنے جواب میں 4/3 کے فیصلہ ہونے کا ذکر بھی کیا تھا۔
چیف جسٹس عمر عطا بندیال نے اٹارنی جنرل سے مخاطب ہوکر کہا کہ آپ کو گھبرانا نہیں چاہیے۔ عدالت آپ کی سماعت کیلئے بیٹھی ہے۔ کوئی معقول نکتہ اٹھایا گیا تو جائزہ لے کر فیصلہ بھی کریں گے۔ عدالت میں نکتہ اٹھایا گیا لیکن اس پر بحث نہیں کی گئی۔ گزشتہ روز نظر ثانی کے دائرہ اختیار پر بات ہوئی تھی۔
نیب اس وقت اختیار کا غلط استعمال کر رہا ہے، چیف جسٹس
چیف جسٹس نے ریمارکس دیے کہ ماضی کو حکومت کے خلاف استعمال نہیں کریں گے۔ حکومت کی نہیں اللہ کی رضا کیلئے بیٹھے ہیں۔ بہت سی قربانیاں دے کر یہاں بیٹھے ہیں۔ اپنے ساتھیوں سے کہیں کہ ہمارے دروازے پر ایسی باتیں نہ کریں، ساتھیوں سے کہیں ایوان میں گفتگو بھی سخت نہ کیا کریں۔
چیف جسٹس کا کہنا تھا کہ ہم اللہ کیلئے کام کرتے ہیں، اس لیے چُپ بیٹھے ہیں۔ جس ہستی کا کام کر رہے ہیں وہ بھی اپنا کام کرتی ہے۔ آپ صفائیاں نہ دیں، عدالت صاف دل کے ساتھ بیٹھی ہے۔ سماعت کے دوران اٹارنی جنرل نے کہا کہ عدالت نے کل آبزرویشن دی جس کو غلط انداز میں پیش کیا گیا۔
عمران خان کو سپریم کورٹ آمد کے لیے مرسڈیز کی فراہمی, بڑی عدالت کا بڑا بیان سامنے آگیا
چیف جسٹس نے کہا کہ ہماری ہرچیز درست رپورٹ نہیں ہوتی ہے، کہا گیا کہ چیئرمین پی ٹی آئی عمران خان کو عدالت نے مرسیڈیز دی تھی۔ ہماری پی آر او نے وضاحت جاری کی اس کو بھی غلط پیش کیا گیا، میں تو مرسیڈیز استعمال ہی نہیں کرتا۔ پولیس نے عمران خان کیلئے بلٹ پروف مرسیڈیز کا بندوبست کیا تھا۔ اس بات کو پتہ نہیں کیا سے کیا بنا دیا گیا۔
چیف جسٹس نے مزید کہا کہ گھبرائیں نہ ماضی کی چیزوں کا آپ پر استعمال نہیں کریں گے۔ ہم نے تو آپ کو دیکھ کر کھلے دل سے گڈ ٹو سی یو کہا۔
بعد ازاں سپریم کورٹ کی جانب سے الیکشن کمیشن کی نظر ثانی اپیل پر سماعت کل تک ملتوی کردی گئی۔
