یوکرین کے صدر نے کہا ہے کہ روسی حملے کے نتیجے میں 137 افراد ہلاک اور سیکڑوں زخمی ہو چکے ہیں۔
غیر ملکی خبر رساں ایجنسی کے مطابق روسی فوج نے یوکرین کے چرنوبیل ایٹمی پاور پلانٹ پر قبضہ کر لیا ہے جس کی یوکرین نے بھی تصدیق کر دی۔ روسی فوج بیلا روس کے راستے یوکرین کے دارالحکومت کیف میں داخل ہو گئی۔
عالمی جوہری توانائی ایجنسی نے کہا ہے کہ یوکرین کے چرنوبیل جوہری پاور پلانٹ محفوظ ہیں اور چرنوبیل جوہری پاور پلانٹ کو کوئی نقصان نہیں پہنچا۔
روس کی حمایت کرنے پر امریکہ نے بیلاروس پر بھی پابندیاں لگا دی ہیں۔ بیلاروس کی 24 کمپنیوں اور شخصیات پر پابندی عائد کی گئی ہے۔
روس کے حملے کے بعد یوکرین کے دارالحکومت کیف میں پیٹرول کی قلت پیدا ہو گئی۔ یوکرینی فوج کا کہنا ہے کہ کیف میں پیٹرول کی شدید قلت کا سامنا ہے اور روس بیلاروس میں گومیل ایئر فیلڈ کو کیف پر حملے کے لیے استعمال کر رہا ہے۔
یہ بھی پڑھیں: صدر جوبائیڈن نے روس پر نئی سنگین پابندیاں عائد کردیں
دوسری جانب فرانس کے صدر نے روسی صدر سے ٹیلی فونک رابطہ کر کے ان سے فوری جنگ بندی کا مطالبہ کیا۔
گزشتہ روز روس کے حملے کے بعد یوکرین کے کئی شہر دھماکوں سے گونج اٹھےتھے۔ روسی فوجی یوکرینی دارالحکومت کیف کے قریب پہنچ گئے تھی اور انہوں نے یوکرینی ائیربیس پر قبضہ بھی کر لیا۔
غیر ملکی خبر رساں ادارے کی رپورٹ کے مطابق روس نے یوکرینی فضائی دفاع کا نظام تباہ کرنے کا دعویٰ کیا جبکہ یوکرین نے روسی طیارے اور ہیلی کاپٹر مار گرانے کا دعویٰ کیا۔
یوکرینی حکام کی جانب سے جاری بیان میں کہا گیا ہے کہ روسی حملوں میں8 شہری، چالیس یوکرینی فوجی ہلاک ہوئے، پچاس روسی فوجی بھی مارے گئے ہیں۔
دوسری جانب روس نے اپنے فوجیوں کی ہلاکت کی تردید کی ہے۔
