اسلام آباد: بلوچستان کے ضلع ہرنائی میں زلزلے سے ہونے والی تباہی پر وزیر اعظم عمران خان سمیت دیگر شخصیات نے افسوس کا اظہار کیا۔
وزیر اعظم عمران خان نے سماجی رابطے کی ویب سائٹ ٹوئٹر پر لکھا کہ میں نے ہرنائی کے زلزلہ متاثرین کی فوری امداد کی ہدایت کر دی ہے جبکہ زلزلے میں ہونے والے نقصانات کی تفصیلات بھی طلب کی ہیں۔
انہوں نے کہا کہ زلزلے میں جانی نقصان پر لواحقین سے اظہار تعزیت کرتا ہوں۔
I have ordered immediate assistance on an emergency basis for the Harnai, Balochistan, earthquake victims & for an immediate assessment of the damage for timely relief & compensation. My condolences & prayers go to the families who lost their loved ones.
— Imran Khan (@ImranKhanPTI) October 7, 2021
زلزلے سے نقصانات اور موجودہ صورتحال کی ابتدائی رپورٹ وزیر اعظم آفس کو موصول ہو گئی۔
صدر پاکستان ڈاکٹر عارف علوی نے بھی بلوچستان زلزے پر افسوس کا اظہار کیا اور کہا کہ اللہ تعالیٰ جاں بحق ہونے والوں کو جوار رحمت میں جگہ دے اور زخمی ہونے والوں کی جلد صحتیابی کے لیے دعاگو ہوں۔
قومی اسمبلی میں قائد حزب اختلاف اور مسلم لیگ ن کے صدر شہباز شریف نے بلوچستان زلزلے میں جانی نقصان پر افسوس کا اظہار کرتے ہوئے کہا کہ وفاقی حکومت امدادی کارروائیوں میں قائدانہ کردار ادا کرے۔
انہوں نے کہا کہ شدید زخمیوں کو ملک کے دیگر اسپتالوں میں منتقل کیا جائے۔
چیئرمین پیپلز پارٹی بلاول بھٹو زرداری نے بلوچستان زلزلے میں جانی نقصان پر افسوس کا اظہار کیا اور کہا کہ وفاقی اور صوبائی حکومت امدادی سرگرمیوں کے لیے ٹھوس اقدامات اٹھائے اور جاں بحق افراد کے لواحقین کو معاوضہ ادا کرے۔
وفاقی وزیر اطلاعات فواد چوہدری نے بلوچستان زلزلے میں جانی نقصان پر افسوس کا اظہار کرتے ہوئے کہا کہ بلوچستان زلزلے سے جانی و مالی نقصان پر پوری قوم افسردہ ہے۔
انہوں نے کہا کہ حکومت زلزلہ متاثرین کی ہر ممکن مدد کرے گی۔
یہ بھی پڑھیں: بلوچستان میں زلزلے نے تباہی مچا دی، 20 افراد جاں بحق
وفاقی وزیر ریلوے اعظم سواتی نے بھی زلزلے میں جانی نقصان پر افسوس کا اظہار کرتے ہوئے کہا کہ مشکل کی گھڑی میں متاثرہ خاندانوں کے دکھ میں برابر کے شریک ہیں۔ زخموں کو سہولیات اور متاثرہ علاقوں میں ریلیف کی فراہمی کو یقینی بنایا جائے۔
وزیر مملکت فرخ حبیب نے کہا کہ مشکل کی اس گھڑی میں بلوچستان کی عوام کے ساتھ کھڑے ہیں۔ ملبے تلے پھنسے افراد کو کوئٹہ کے اسپتالوں میں منتقل کیا جا رہا ہے۔
انہوں ںے کہا کہ بلوچستان حکومت زلزلے سے بے گھر ہونے والوں کی ہرممکن مدد کرے گی۔
تمام صوبوں کے وزرائے اعلیٰ نے بھی بلوچستان زلزلے پر افسوس کا اظہار کیا۔
