اسلام آباد: وزیراعظم عمران خان نے کہا ہے کہ ہمیں کشمیریوں کو بھرپور پیغام دینا چاہیے کہ ہم ہرصورت ان کے ساتھ کھڑے ہیں۔
اپنے ٹوئٹر پیغام میں ان کا کہنا تھا کہ تمام پاکستانی کل آدھے گھنٹے کے لیے کشمیریوں کے ساتھ اظہار یکجہتی کریں۔
We must send a strong message to Kashmiris that our nation stands resolutely behind them. So I am asking all Pakistanis for half an hour tomorrow stop whatever you are doing & come out on the road to show solidarity with the Kashmiri people.
— Imran Khan (@ImranKhanPTI) August 29, 2019
انہوں نے کہا کہ پاکستانیوں سے درخواست ہے کہ کل دن 12 بجے سے ساڑھے 12 بجے تک باہر نکلیں۔
وزیراعظم نے کہا کہ مقبوضہ کشمیر میں 24 روز سے جاری کرفیو کےخلاف پاکستانی اپنے جذبات کا اظہار کریں۔
ان کا کہنا تھا کہ مقبوضہ وادی میں بھارتی قابض فوج روزانہ کشمیری عورتوں اور بچوں پر ظلم ڈھارہی ہے۔
انہوں نے کہا کہ مودی حکومت کے ایجنڈے کے مطابق کشمیریوں کی نسل کشی کی جارہی ہے۔
ان کا مزید کہنا تھا کہ کشمیریوں کی آبادی کے تناسب کی تبدیلی جنیوا کنونشن کے تحت جنگی جرم ہیں۔
ہم نیوز کے مطابق کل اسلام آباد کی تمام شاہراہوں پر ٹریفک سگنل 12 بجے سرخ کردیئے جائیں گے۔
بارہ بجے سے ساڑھے 12 بجے تک ٹریفک آدھا گھنٹے کےلیے روک دی جائے گی جبکہ اشاروں اور شاہراہوں پر کشمیریوں سے اظہار یکجہتی کے لیے احتجاج کیا جائے گا۔
ٹھیک 12 بجے سائرن بجیں گے اور قومی ترانہ پڑھا جائے گا جس کے بعد کشمیر کا ترانہ بھی پڑھا جائے گا۔
ضلعی انتظامیہ کے زیر اہتمام مرکزی اجتماع ڈی چوک میں ہو گا، وہاں پر سرکاری دفاتر کا عملہ کشمیریوں سے اظہار یکجہتی کرے گا۔
اس کے علاوہ تحریک انصاف کے وزرا اور مقامی قائدین بھی ڈی چوک پر جمع ہوں گے۔ اس حوالے سے اسلام آباد ٹریفک پولیس کو آگاہ کردیا گیا۔
