گوجرانوالہ: دریائے چناب سے ملحقہ علاقوں سے شہریوں کے فوری انخلا کا الرٹ جاری کر دیا گیا۔
دریائے چناب میں اونچے درجے کے سیلاب کا خدشہ ہے۔ جس کے باعث دریائے چناب سے ملحقہ علاقوں سے شہریوں کے فوری انخلا کا الرٹ جاری کیا گیا۔
مرالہ بیراج کے مقام پر 4 لاکھ 79 ہزار کیوسک پانی کی آمد ریکارڈ کی گئی۔ جبکہ اخراج 4 لاکھ 70 ہزار 8 کیوسک ریکارڈ ہوا۔۔ خانکی بیراج وزیرآباد میں پانی کی آمد 2 لاکھ 55 ہزار 800 کیوسک اور اخراج 2 لاکھ 48 ہزار کیوسک ریکارڈ کیا گیا۔
حکام کے مطابق دریائے چناب میں گزشتہ 24 گھنٹوں میں پانی کی سطح میں مسلسل اضافہ ہو رہا ہے۔
واضح رہے کہ محکمہ موسمیات نے 27 سے 31 اگست کے دوران مزید موسلا دھار بارشوں کی پیشگوئی کر رکھی ہے۔ جس کے باعث پہاڑوں پر لینڈ سلائیڈنگ کا بھی خدشہ ہے۔
آئندہ 48 گھنٹوں کے دوران دریائے راوی کے بالائی علاقوں میں بھی بارشوں کا الرٹ جاری کیا گیا ہے۔ نیشنل ڈیزاسٹر مینجمنٹ اتھارٹی (این ڈی ایم اے) کے مطابق بھارتی ڈیم تھین اپنی گنجائش کے مطابق 97 فیصد تک بھر چکا ہے۔ اور بھارتی ڈیم تھین کے اسپل ویز کسی بھی وقت کھولے جا سکتے ہیں۔ اور بھارتی ڈیم سے پانی کے ممکنہ اخراج کے باعث دریائے راوی میں اونچے درجے کا سیلاب متوقع ہے۔
یہ بھی پڑھیں: بلوچستان میں سیکیورٹی فورسز کی کارروائی، فتنہ الخوارج کے 47 دہشتگرد ہلاک
دوسری جانب اسپیکر پنجاب اسمبلی ملک احمد خان نے قصور میں دریائے ستلج اور سیلاب متاثرہ علاقوں کا دورہ کیا۔
ملک احمد خان نے انتظامیہ کو سیلاب متاثرین کی ہر ممکن مدد کی ہدایت کی۔ جبکہ تلوار پوسٹ پر امدادی کاموں کا جائزہ لیا اور ریسکیو آپریشن تیز کرنے کی ہدایت کی۔ اسپیکر پنجاب اسمبلی نے سیلاب متاثرین سے ملاقات بھی کی۔ اور ان کی ہر ممکن امداد کی یقین دہانی کرائی۔
