اسلام آباد: گزشتہ 12 ماہ کے دوران ریل کے ذریعے سفر کرنے والوں کی تعداد میں 44 لاکھ افراد کا اضافہ ہوا ہے۔
قومی اسمبلی کی قائمہ کمیٹی برائے ریلوے کو بتایا گیا کہ اس عرصے کے دوران ریلوے کے مسافروں کی تعداد پانچ کروڑ سے تجاوز کر گئی ہے۔
انہوں نے بتایا کہ ایک سال کے دوران ریل کے 74 حادثے پیش آئے جن میں 61 واقعات ریل کے پٹڑی سے اتر جانے کے ہیں، 12 حادثے سنجیدہ نوعیت کے تھے جبکہ آگ لگنے کے چار واقعات پیش آئے۔
ریلوے حکام نے حادثوں کے اعداد و شمار بتاتے ہوئے کہا کہ 2014-15 میں 89، 2015-16 میں 76، 2016-17 میں 78 حادثے پیش آئے، 2017-18 میں یہ تعداد کم ہو کر 67 پر آ گئی تاہم 2018-19 میں پھر بڑھ کر 74 پر پہنچ گئی۔
ریلوے حکام کا کہنا تھا کہ 74 حادثوں میں سے 54 کی تحقیقات مکمل ہو چکی ہیں جبکہ 20 پر ابھی تک کام ہو رہا ہے، 13 افراد کو سزا ہو چکی ہے اور 34 کے خلاف ایف آئی آر درج کی گئی ہے۔
کمیٹی کو بتایا گیا کہ پاکستان ریلویز نے سالانہ ترقیاتی پروگرام (پی ایس ڈی پی) میں 28 ارب مانگے تھے لیکن صرف 16 ارب کی منظوری دی گئی۔
یہ بھی بتایا گیا کہ اس وقت 136 مسافر گاڑیاں چل رہی ہیں، 2017-18 میں 4 کروڑ 57 لاکھ مسافروں نے سفر کیا جبکہ 2018-19 میں ان کی تعداد بڑھ کر 5 کروڑ دس لاکھ ہو گئی۔