بیجنگ: پاکستان کے دیرینہ دوست چین نے اسٹریٹجک پارٹنرشپ کے لیے پاکستان کی حمایت جاری رکھنے کے عزم کا اعادہ کیا ہے۔
پاکستان آرمی کے سربراہ چیف جنرل قمر جاوید باجوہ کے تین روزہ دورہ چین کے دوران دونوں دوست ممالک نے ایک بار پھر خطے کی ترقی کے لیے ایک دوسرے کے ساتھ مل کر کام کرنے کے عزم کا اظہار کیا ہے۔
دورہ چین کے دوران جنرل قمر جاوید باجوہ نے چین کے صدر شی جن پنگ سے ملاقات بھی کی جس میں سی پیک کی بروقت تکمیل کو یقینی بنانے پر اتفاق کیا گیا۔
ملاقات کے دوران شی جن پنگ اور پاکستان کے آرمی چیف نے سی پیک کو خطے کی ترقی کا منصوبہ قرار دیا اور اس کے جاری منصوبوں اور سیکیورٹی کی صورت حال پر تبادلہ خیال بھی کیا۔
آرمی چیف اور چینی صدر کا کہنا تھا کہ پاکستان اور چین نے سمندر سے گہری اور ہمالیہ سے بلند دوستی کے سفر کے دوران کٹھن حالات میں ہمیشہ ایک دوسرے کا ساتھ دیا ہے اور یہ دوستی ہر آزمائش پر پورا اتری ہے۔
COAS called on Chinese President Xi Jinping on special invitation. Both discussed regional security environment, challenges and way forward. pic.twitter.com/j4DPyXZBTu
— DG ISPR (@OfficialDGISPR) September 19, 2018
شی جن پنگ نے سی پیک میں پاک فوج کی گہری دلچسپی اور سیکیورٹی کی فراہمی کو بھی سراہا اور خطے میں امن کے لیے پاک فوج کی قربانیوں کا اعتراف بھی کیا۔
آرمی چیف جنرل قمر جاوید باجوہ نے پاک فوج کے سی پیک کو کامیاب بنانے کے لیے تمام وسائل کو بروئے کار لانے کے عزم کو بھی دہرایا۔ ان کا کہنا تھا کہ سی پیک سے صرف پاکستان کا ہی نہیں بلکہ خطے کا مستقبل بھی جڑا ہے۔
پاکستانی سپہ سالار نے اس یقین کا اظہار کیا کہ پاک چین تعلقات ہر گزرتے دن کے ساتھ مزید مستحکم ہوں گے۔
