اسلام آباد: نومتخب وزیراعظم پاکستان عمران خان نے پنجاب کی وزارت اعلی کے لیے نامزد امیدوار عثمان بزدار کے ساتھ کھڑا ہونے کا اعلان کیا ہے۔
سماجی رابطے کی سائٹ ٹویٹر کے ذریعے انہوں نے کہا کہ عثمان بزدار ایک دیانت دار اور نئے پاکستان کے ویژن کو لے کر چلنے والے شخص ہیں، وہ اپنے نامزد وزیراعلیٰ کے ساتھ کھڑے ہیں، انہوں نے دو ہفتے تفصیلی مشاورت اور چھان پھٹک کے بعد یہ فیصلہ کیا ہے۔
میں واضح کر دوں کہ میں پنجاب میں وزارت اعلیٰ کے لئے نامزد امیدوار عثمان بزدار کے ساتھ کھڑا ہوں۔ گذشتہ دو ہفتوں میں میں نے تمام ضروری چھان پھٹک مکمل کرلی ہے اور انہیں ایک دیانتدار شخص پایا ہے۔ وہ ایک باوقار آدمی ہیں جو نئے پاکستان کے حوالے سے میرے نظریے اور ویژن کے ساتھ کھڑے ہیں۔
— Imran Khan (@ImranKhanPTI) August 18, 2018
انہوں نے کہا کہ عثمان بزدار کا تعلق پنجاب کے پسماندہ ترین ڈویژن ڈی جی خان کے قبائلی علاقے سے ہے، یہ ایک ایسا خطہ ہے جہاں بجلی اور پانی تک دستیاب نہیں اور دو لاکھ افراد کے لیے ایک ڈاکٹر ہے۔
وزیراعظم پاکستان نے کہا کہ نامزد وزیراعلی پنجاب کو پسماندہ علاقوں کے عوام کو درپیش مسائل کا بخوبی ادراک ہے اور وہ بطور وزیراعلیٰ ان علاقوں کی بہتر تعمیر و ترقی کے قابل ہوں گے۔
پنجاب میں پہلی مرتبہ ایسا وزیر اعلیٰ آئے گا جس کا تعلق پسماندہ علاقے سے ہو اور جو جانتا ہو کہ عملی طور پر کیا کیا جانا چاہئیے۔ میں ہر لحاظ سے عثمان بزدار کے ساتھ ہوں۔ https://t.co/yAbHk7VtrV
— Imran Khan (@ImranKhanPTI) August 18, 2018
ان کا کہنا تھا کہ پنجاب میں پہلی مرتبہ ایسا وزیر اعلیٰ آئے گا جس کا تعلق پسماندہ علاقے سے ہے اور جو جانتا ہے کہ ان علاقوں کے لیے عملی طور پر کیا کرنا چاہیے۔