کابل: وزیر داخلہ محسن نقوی نے کہا کہ افغان شہریوں کی قانونی طور پر پاکستان آمد کے دروازے کھلے ہیں۔
وزیر داخلہ محسن نقوی نے افغان وزیر داخلہ سراج الدین حقانی سے ملاقات کی۔ افغان وزارت داخلہ آمد پر سراج الدین حقانی نے محسن نقوی کا خیر مقدم کیا۔ ملاقات میں دوطرفہ تعلقات خصوصاً انسداد دہشت گردی اور کالعدم تحریک طالبان کے حوالے سے تبادلہ خیال کیا گیا۔
سرحد کی مؤثر مینجمنٹ، منشیات کی روک تھام اور نقل و حرکت کو منظم کرنے پر بھی بات چیت ہوئی۔ جبکہ پاکستان میں غیر قانونی مقیم افغان شہریوں کے وطن واپسی پر بھی گفتگو کی گئی۔
دونوں وزرائے داخلہ نے پرامن بقائے باہمی، استحکام اور تعاون کی ضرورت پر زور دیا۔ جبکہ پاک افغان بارڈر مینجمنٹ اور دہشت گردی کے خاتمہ کے لیے باہمی تعاون کو مضبوط بنانے پر اتفاق کیا گیا۔
یہ بھی پڑھیں: وزیر اعلیٰ خیبر پختونخوا کا گورنر ہاؤس میں اراکین کی حلف برداری کو چیلنج کرنے کا فیصلہ
وزیر داخلہ محسن نقوی نے کہا کہ دہشت گرد تنظیمیں فساد اور عدم استحکام کا باعث بن رہی ہیں۔ جسے مل کر روکنا ہو گا۔ پاکستان افغانستان کے ساتھ برادرانہ اور دیرپا تعلقات کا خواہاں ہے۔
انہوں نے کہا کہ پاکستان نے کئی دہائیوں تک لاکھوں افغان مہاجرین کی مہمان نوازی کی۔ اور افغان شہریوں کی قانونی طور پر پاکستان آمد کے دروازے کھلے ہیں۔
