ایف آئی اے اینٹی کرپشن سرکل اسلام آباد نے ڈریپ کے سابق سی ای او اختر حسین کی جعلی ڈگری بنانے میں ملوث مرکزی ملزم کو گرفتار کر لیا۔
ایف آئی اے ٹیم نے اسلام آباد کے سیکٹر ایف ٹین میں چھاپہ مار کر ملزم محمد امین بیگ کو گرفتار کر لیا۔ ملزم دی اوپن انٹرنیشنل یونیورسٹی سری لنکا کے نام سے جعلی ڈگری جاری کرتا تھا اور ایجنٹوں کے ذریعے جعلی اور غیر قانونی ادارہ چلا رہا تھا۔
ایف آئی اے حکام کے مطابق ملزم کو پہلے سے گرفتار ملزمان کی نشاندہی پر گرفتار کیا گیا، ملزم سرٹیفکیٹ کے اجراء کے لیے جعلی بین الاقوامی کونسل بھی چلا رہا تھا۔
جعلی ڈگری پر بھرتی کرنیوالے (ر) افسران کیخلاف کارروائی نہیں ہوسکتی، ایوی ایشن ڈویژن
ترجمان ایف آئی اے کے مطابق ملزم ایم ڈی کی ڈگری کے لیے ایک ہزار اور پی ایچ ڈی کی ڈگری کے لیے 1500 ڈالر وصول کرتا تھا، ملزم سے پرنٹڈ ڈگری ، مہریں اوریونیورسٹی داخلہ فارم برآمد کرکے تفتیش شروع کر دی ہے۔
واضح رہے کہ گرفتار سابق سی ای او ڈریپ شیخ اختر حسین نے بھی مذکورہ جعلی ڈگری ملزم سے حاصل کی تھی اور اسی جعلی ڈگری کی بنیاد پر ڈریپ میں بطور سی ای او تعینات ہوئے تھے۔
