سابق کرکٹر و سابق عبوری چیف سلیکٹر شاہد آفریدی نے پی سی بی مینجمنٹ کمیٹی کے سربراہ نجم سیٹھی کے بابر اعظم کی کپتانی سے متعلق بیان پر ردعمل کا اظہار کیا ہے۔
تفصیلات کے مطابق اپنی ٹوئٹ میں شاہد آفریدی کا کہنا تھاکہ بابراعظم کی کپتانی سے متعلق نجم سیٹھی سے بات ہوئی ہے اور انہوں نے تصدیق کی کہ بابراعظم کی کپتانی کی بات کرتے ہوئے میرا حوالہ نہیں دے رہے تھے۔
انہوں نے کہا کہ اب یہ معاملہ ختم ہو چکا ہے۔ بابراعظم اور ٹیم کےلیے نیوزی لینڈ کےخلاف سیریز کےلیے نیک خواہشات ہیں۔
I spoke with Mr Najam Sethi who was kind enough to confirm he was not referring to me while commenting about Babar Azam’s captaincy. He has further clarified this in his social media posts. This has put the matter to bed.
All the best to Babar and his side for the series vs NZ— Shahid Afridi (@SAfridiOfficial) April 10, 2023
خیال رہے کہ سوشل میڈیا پر ایک انٹرویو کے دوران نجم سیٹھی نے کہا تھا کہ میں بغیر کسی کا نام لیے کچھ باتیں بتانا چاہتا ہوں۔ جب میں بطور چیئرمین پی سی بی آیا تو ہم نے ایک کمیٹی بنائی۔ اس دوران نیوزی لینڈ کے خلاف قومی ٹیم کی ایک سیریز چل رہی تھی۔
نجم سیٹھی نے بتایا کہ اس وقت کے سلیکٹرز نے اپوائنٹ ہونے سے پہلے کہا کہ ٹیم میں کچھ تبدیلیاں کرنی پڑیں گی جس میں بابر اعظم کو بھی تبدیل کرنا پڑے گا۔
چیئرمین پی سی بی نے بتایا کہ جیسے ہی وہ سیلکٹر اپوائنٹ ہوگئے، انہوں نے اپنا مؤقف تبدیل کرتے ہوئے کہا کہ تبدیلیوں کی ضرورت نہیں۔ میں نے بھی کہا کہ مجھے کوئی مسئلہ نہیں ہے۔