راولپنڈی: کورونا کیسز سامنے کے بعد گورنمنٹ گرلز پرائمری اسکول ڈھوک رحیم بخش کو بند کردیا گیا۔
ڈسٹرکٹ ہیلتھ اتھارٹی راولپنڈیکی جانب سے نوٹیفکیشن کے مطابق کورونا کیسز اسکول اسٹاف اور طالبات میں رپورٹ ہونے کے بعد گورنمنٹ گرلز پرائمری اسکول ڈھوک رحیم بخش کو 20 مارچ تک بند کردیا گیا ہے۔
دوسری جانب ڈسٹرکٹ ہیلتھ آفیسر اسلام آباد نے ہدایت کی ہے کہ کورونا وائرس میں اضافے کے پیش نظر ہنگامی بنیادوں پر اقدامات کیے جائیں۔
کورونا: اسلام آباد کے 3 تعلیمی ادارے بند کرنے کا فیصلہ
ہم نیوز کے مطابق ڈی ایچ او اسلام آباد ضعیم ضیا نے یہ ہدایت ڈپٹی کمشنر اسلام آباد حمزہ شفقات کو لکھے گئے خط میں دی ہے۔
ذمہ دار ذرائع کے مطابق ڈی ایچ او اسلام آباد کی جانب سے لکھے جانے والے خط میں مؤقف اختیار کیا گیا ہے کہ کورونا کیسز میں اضافہ سامنے آ رہا ہے۔
ڈپٹی کمشنر اسلام آباد کو بھیجے جانے والے خط میں ڈی ایچ او نے انکشاف کیا ہے کہ اسلام آباد کے تعلیمی اداروں اور دفاتر میں کورونا کیسز زیادہ سامنے آرہے ہیں۔
ذمہ دار ذرائع کے مطابق ڈی ایچ او اسلام آباد کے خط میں کہا گیا ہے کہ کورونا کے مثبت کیسز کی شرح 6 فیصد سے زیادہ ہو گئی ہے۔
پاکستان میں کورونا کےایک ہزار 353نئےکیسز رپورٹ
وفاقی دارالحکومت اسلام آباد کے ڈپٹی کمشنر کے نام بھیجے جانے والے خط میں ڈی ایچ او نے کہا ہے کہ ہنگامی بنیادوں پر کورونا کیسز کے پھیلاؤ کو روکنے کے لیے اقدامات کیے جائیں۔
ہم نیوز کے مطابق ڈی ایچ او نے اس ضمن میں ڈپٹی کمشنر کو تجویز دی ہے کہ تعلیمی اداروں میں حاضری 50 فیصد سے زیادہ نہیں ہونی چاہیے۔
ذرائع کے مطابق ڈی ایچ او کی جانب سے اس سلسلے میں یہ تجویز بھی دی گئی ہے کہ کلاسوں کو چار گھنٹوں کی شفٹ میں بھی تبدیل کیا جا سکتا ہے۔
ذرائع کے مطابق ڈپٹی کمشنر کو ڈی ایچ او کی جانب سے تجویز دی گئی ہے کہ چھٹی والے دنوں میں بھی کلاسیں لی جا سکتی ہیں۔
