اسلام آباد: کورونا وائرس از خود نوٹس کیس میں سندھ حکومت نے اپنی رپورٹ سپریم کورٹ میں جمع کرا دی۔
سندھ حکومت کی جانب سے جمع کراءی گءی رپورٹ کے مطابق زکوۃ اور بیت المال سے متعلق تفصیلی رپورٹ پہلے جمع کرا چکے ہیں۔
رپورٹ میں کہا گیا کہ ٹوٹل زکوۃ فنڈ کا 23.71 فیصد سندھ کو ملتا ہے۔ 20-2019 میں سندھ کے پاس 2041.1 ملین روپے زکوۃ فنڈ اکٹھا ہوا۔
رواں برس ایک ہزار 200 ملین گزارا الاؤنس کے لیے مختص کیے گئے ہیں جبکہ دینی مدارس، ہیلتھ کیئر، سوشل ویلفیئر اور غریب بچیوں کی شادیوں کے لیے 203 ملین مختص ہیں۔
رپورٹ میں کہا گیا کہ تعلیمی معاونت اور عید پیکچ کے لیے ایک ہزار 491 ملین روپے مختص ہیں اور زکوۃ فنڈ سے عملے کے 817 افراد کی تنخواہوں پر 185.9 ملین روپے خرچ ہوتے ہیں۔
سندھ حکومت نے مؤقف اختیار کیا کہ 390 صنعتی یونٹس کو ایس او پیز کے مطابق کھولنے کی اجازت دی گئی ہے اور طبی عملے سمیت تمام ورکرز کو حفاظتی طبی سامان مہیا کیا جا رہا ہے۔
رپورٹ میں کہا گیا کہ سندھ میں روزانہ 74 ہزار 170 کورونا وائرس ٹیسٹ کی صلاحیت موجود ہے۔ کورونا وائرس کے باعث کراچی کی 11 یونین کونسلز کو سیل کیا گیا تھا اور اگر یونین کونسلز میں لاک ڈاوَن نہ کیا جاتا تو مزید کیسز بڑھنے کا خدشہ تھا۔
پاکستان میں کورونا وائرس سے اب تک جاں بحق افراد کی تعداد 440 ہو گئی جبکہ کورونا کے مریضوں کی تعداد 19 ہزار 103 تک پہنچ گئی۔
نیشنل کمانڈ اینڈ آپریشن سنٹر کی جانب سے جاری کردہ تازہ اعداد و شمار کے مطابق پاکستان میں گزشتہ 24 گھنٹوں کے دوران 989 کیسز اور 23 اموات رپورٹ ہوئی ہیں۔ ملک میں کوروناوائرس کے 4 ہزار 817 مریض صحت یاب ہو چکے ہیں۔
یہ بھی پڑھیں: اسلام آباد: دو ڈاکٹروں میں کورونا وائرس کی تصدیق
پنجاب میں کورونا کے اب تک 7 ہزار 106 کیسز رپورٹ ہوئے ہیں۔ سندھ 7 ہزار 102، خیبرپختونخوا 2,907، بلوچستان 1,172، اسلام آباد 393، آزاد کشمیر 67 اورگلگت بلتستان میں 356 افراد میں وائرس کی تصدیق ہوئی ہے۔
