پاکستان کے زرمبادلہ کے ذخائر مارچ 2022 کے بعد بلند ترین سطح پر پہنچ گئے ہیں۔
اعداد و شمار کے مطابق ملکی زرمبادلہ ذخائر 21.1 ارب ڈالر تک پہنچ گئے ہیں، جن میں سے اسٹیٹ بینک آف پاکستان کے پاس موجود ذخائر 15.9 ارب ڈالر ریکارڈ کیے گئے ہیں۔
اس کے ساتھ ساتھ پاکستان کی درآمدی صلاحیت 2.6 ماہ سے تجاوز کرچکی ہے، جب کہ فروری 2023 میں یہ مدت دو ہفتوں سے بھی کم رہ گئی تھی۔
معاشی ماہرین کا کہنا ہے کہ ذخائر میں اضافہ بیرونی قرضوں کے سہارے نہیں بلکہ مقامی معاشی ترقی اور سرمایہ کاروں کے اعتماد کی بحالی کے باعث ہوا ہے۔
ان کے مطابق بیرونی قرضہ بمقابلہ جی ڈی پی تناسب 31 فیصد سے کم ہو کر 26 فیصد تک آگیا ہے، جو مالی نظم و ضبط اور اصلاحاتی اقدامات کی عکاسی کرتا ہے۔
ماہرین کے مطابق 2023 میں مرکزی بینک کے ذخائر 2.9 ارب ڈالر تھے، جو اب بڑھ کر 15.9 ارب ڈالر تک جا پہنچے ہیں۔
ان کا کہنا ہے کہ پاکستان قرضوں پر مبنی وقتی معاشی پالیسی سے نکل کر پائیدار بیرونی معاشی استحکام کی جانب بڑھ رہا ہے۔
