پاکستان نے بھارت کو شکست دے کر انڈر 19 ایشیا کپ کا ٹائٹل اپنے نام کر لیا مگر اس میچ میں پاکستان کے پہاڑ جیسے سکور کے پیچھے جس نوجوان کا ہاتھ تھا، اسے لمبی اننگز کھیلنے کا بہت شوق ہے۔
صرف 19 سال اور 19 دن کی عمر میں دو بڑی اننگز کھیلنے والے سمیر منہاس دو دسمبر سنہ 2006 کو ملتان میں پیدا ہوئے۔ دائیں ہاتھ کے اوپننگ بلے باز کا تعلق ایک ایسے خاندان سے ہے جس میں پہلے ہی سے ایک اور انٹرنیشنل کرکٹ موجود ہے۔
وہ پاکستان کی چار ٹی20 انٹرنیشنل میچوں میں نمائندگی کرنے والے عرفات منہاس کے چھوٹے بھائی ہیں، جنھوں نے 2023 اور 2024 میں ہانگ کانگ، افغانستان، بنگلہ دیش اور زمبابوے کے خلاف گرین شرٹس کی نمائندگی کی۔
Sameer Minhas 172 against India U-19 pic.twitter.com/WzVIzAQIgF
— Rashid Latif | 🇵🇰 (@iRashidLatif68) December 21, 2025
یہ پہلا موقع نہیں جب جنوبی پنجاب کے شہر ملتان سے تعلق رکھنے والے سمیر منہاس نے ایک بڑی اننگز کھیل کر ٹیم کو اچھا آغاز فراہم کیا ہو۔ اسی ایونٹ کے مجموعی طور پر دوسرے اور پاکستان کے پہلے میچ میں انھوں نے ملائیشیا کے خلاف 177 رنز کی ناقابل شکست اننگز کھیلی تھی۔
ملائیشیا کے خلاف اننگز میں انھوں نے 11 چوکے اور آٹھ چھکے مارے تھے۔
ACC President Mohsin Naqvi applauds STAR performer Sameer Minhas 🌟#PAKvIND | #PakistanFutureStars | #U19AsiaCup pic.twitter.com/H6K9eO60cF
— Pakistan Cricket (@TheRealPCB) December 21, 2025
سمیر منہاس ان نوجوان کھلاڑیوں میں سے ایک ہیں جو پاکستان کرکٹ بورڈ کے پاتھ وے سسٹم سے سامنے آئے ہیں۔ پاکستان انڈر 19 کی نمائندگی کرنے سے پہلے وہ ملتان ریجن انڈر 13، سدرن پنجاب انڈر 16، ملتان انڈر 19 اور ملتان ریجن انڈر 19 کی نمائندگی کر چکے تھے۔
