سینیئر قانون دان اعتزاز احسن نے کہا ہے کہ میرا نہیں خیال چیئرمین پاکستان تحریک انصاف (پی ٹی آئی) کو توشہ خانہ کیس میں رہائی ملے گی۔
نجی ٹی وی چینل کے پروگرام میں گفتگو کرتے ہوئے انہوں نے اسلام آباد ہائیکورٹ میں چیئرمین پی ٹی آئی کی سزا معطلی کیس سے متعلق اظہار خیال کیا۔ انہوں نے کہا کہ یہ حکومت بہت بدسلوکی کر رہی ہے، نگران حکومت بھی جانبدار ہوگئی ہے۔
اعتزاز احسن کا کہنا تھا کہ اعظم سواتی کے ساتھ بھی یہی کیا جاتا رہا کہ ایک طرف سے ضمانت ہوتی تھی تو دوسرے تھانے کی پولیس گرفتاری کیلئے باہر کھڑی ہوتی تھی۔
چئیرمین پی ٹی آئی کی سزا معطلی کا کیس، فیصلہ محفوظ
انہوں نے کہا کہ سائفر کا کوئی کیس نہیں ہے، کسی وزیراعظم کے خلاف یہ کیس بن ہی نہیں سکتا۔ کوئی بھی وزیراعظم ہو اسے یہ اختیار حاصل ہے کہ سائفر ‘ڈی کلاسیفائی’ کرے یا ‘کلاسیفائی’ کرنا چاہے۔
پروگرام کے دوران اینکر نے سوال کیا کہ کیا کسی وزیراعظم کو یہ حق حاصل ہے کہ ایسے دستاویز کو پبلک میٹنگ میں لہرا دے؟ جواب میں اعتزاز احسن نے کہا کہ ایک مرتبہ اگر دستاویز ڈی کلاسیفائی کردیا جائے پھر اسکی 40 ہزار کاپیاں بھی بن جائیں، کوئی فرق نہیں پڑے گا۔
خیال رہے کہ چیئرمین پی ٹی آئی کی سزا معطلی کی درخواست سے متعلق کیس میں گزشتہ روز اسلام آباد ہائیکورٹ نے فیصلہ محفوظ کرلیا تھا۔ عدالتی عملے کے مطابق فیصلہ آج سنایا جائے گا۔
