نگران وزیراعلیٰ پنجاب محسن نقوی نے کہا ہے کہ لاہور میں بارش سے چھ افراد جاں بحق ہو گئے ہیں، رات نو بجے بارش کا ایک اور اسپیل متوقع ہے۔
ان کا کہناتھا کہ شہر میں پانی نکالنے کے لئے 159 پمپس کام کر رہے ہیں، کوشش ہے اگلے اسپیل سے پہلے پانی نکال دیں گے۔
لاہور میں موسلادھار بارش سے نشیبی علاقے پانی میں ڈوب گئے، بعض علاقے ندی نالے کا منظر پیش کر رہے ہیں۔
گزشتہ 10گھنٹے میں سب سے زیادہ لکشمی چوک میں 234 ملی میٹر بارش ریکارڈکی گئی،نشتر ٹاؤن کے علاقے میں 201 اورقرطبہ چوک میں 213ملی میٹر، پانی والا تالاب میں 201،جوہر ٹاؤن میں 183، تاجپورہ اسکیم میں 202اور گلشن راوی میں 200 ملی میٹر بارش ریکارڈ کی گئی۔
لاہور میں موسلادھار بارش کی وجہ سے لیسکو کے 110 فیڈرزسے بجلی کی سپلائی عارضی طور پرمعطل ہو گئی ہے، ترجمان لاہور الیکٹرک سپلائی کمپنی کے مطابق فیلڈ اسٹاف کو ہائی الرٹ کر دیا گیاہے،شدید بارش کے باعث بجلی بحالی کے کاموں میں مشکلات کا سامنا ہے،ترجمان کا کہنا تھا کہ بارش رکتے ہی بجلی بحالی کا کام شروع کر دیا جائے گا۔
بارشوں کا سلسلہ 8 جولائی تک جاری رہنے کا امکان ہے، محکمہ موسمیات
ایم ڈی واسا کا کہنا ہے کہ لاہور میں بارش کا تیس سالہ ریکارڈ ٹوٹ گیا ہے۔ دس گھنٹوں میں 291 ملی میٹر بارش ریکارڈ کی گئی۔
لاہور میں بارش کا پانی سڑکوں پر کھڑا ہونے سے ٹریفک کی روانی میں خلل پیدا ہو گیا، شہریوں کو شدید پریشانی کا سامنا کرنا پڑ رہا ہے۔
ملتان اور گردونواح میں سورج اور بادلوں کی آنکھ مچولی کا سلسلہ جاری ہے،محکمہ موسمیات نے آج شام ملتان اور گرد و نواح میں تیز بارش ہونے کاامکان ظاہر کیا ہے۔
پنجاب کے مختلف شہروں میں کہیں ہلکی تو کہیں موسلادھاربارش ہوئی،محکمہ موسمیات کے مطابق ملک کے مختلف علاقوں میں بارشوں کا یہ سلسلہ آٹھ جولائی تک جاری رہنے کا امکان ہے۔
محکمہ موسمیات کے مطابق بلوچستان کے بیشتراضلاع میں موسم گرم اور مرطوب رہے گا،زیارت،قلات،خضدار،اور بارکھان میں چندمقامات پرآندھی اوربارش کاامکان ظاہر کیا گیا ہے۔
