اسلام آباد: جعلی ڈگری کیس میں نااہل لیگی رکن صوبائی اسمبلی کاشف محمود چوہدری کو الیکشن کمیشن نے ڈی نوٹیفائی کردیا۔
ہم نیوز کے مطابق الیکشن کمیشن نے کاشف محمود چوہدری کی پی پی 241 بہاولنگر سے کامیابی کا نوٹیفکیشن واپس لے لیا۔
نوٹیفیکیشن کے مطابق اسلام آباد ہائیکورٹ نے کاشف محمود کی نااہلی کا فیصلہ 31 جنوری کو سنایا تھا۔
کاشف چوہدری پی پی 241 سے ن لیگ کے رکن صوبائی اسمبلی منتخب ہوئے تھے۔ ان پر بی بی اے کی جعلی ڈگری الیکشن کمیشن میں جمع کرانے کا الزام تھا۔
درخواست گزار عبدالغفار نے کاشف چوہدری کو 62 ون ایف کے تحت نااہل کرنے کی استدعا کی تھی۔
گزشتہ سال سمبر میں ن لیگ سے ہی تعلق رکھنے والے وزیر کھیل آزاد کشمیر چوہدری محمد سعید کو نااہل قرار دیا گیا تھا۔
سپریم کورٹ آزاد کشمیر نے اپنے فیصلے میں چوہدری محمد سعید کو پانچ سال کے لیے نااہل قرار دیا۔
وزیر کھیل کے خلاف سرکاری رقبے پر ناجائز تجاوزات اور توہین عدالت کیس تھا۔
اکتوبر 2018 میں پاکستان کی سپریم کورٹ نے پاکستان مسلم لیگ ن کے دو سینیٹرز کو نا اہل قرار دیا تھا۔
نااہل قرار دیے جانے والے سینیٹرز میں سعدیہ عباسی اور ہارون اختر شامل تھے۔ دونوں سینیٹرز کے پاس دوہری شہریت تھی جس کی بنا پر ان کو نااہل قرار دیا گیا۔
عدالت نے الیکشن کمیشن کو حکم دیا تھا کہ دونوں نشستوں پر دوبارہ الیکشن کرائے جائیں۔
