سابق وزیر خزانہ ڈاکٹر حفیظ پاشا نے کہا ہے کہ پیٹرولیم لیوی بڑھنے کے نتیجے میں پیٹرولیم مصنوعات کی قیمتوں میں اضافہ ہوگا۔
نجی ٹی وی چینل سے گفتگو کرتے ہوئے انہوں نے وفاقی بجٹ 2023-24 کے حوالے سے اظہار خیال کیا۔ انہوں نے کہا کہ بجٹ جس انداز میں پیش کیا گیا، امید تھی کہ پاکستان کے لوگوں کو مطمئن کیا جائے گا۔ امید تھی کہ وزیر خزانہ اسحاق ڈار آغاز میں بتاتے کہ ہم دیوالیے کے دلدل سے نکل چکے ہیں۔
پیٹرولیم ڈویلپمنٹ لیوی 60 روپے لیٹر کرنے کی تجویز
حفیظ پاشا کا کہنا تھا کہ وفاقی بجٹ میں پیٹرولیم لیوی کا رواں سال کے ریوینیو سے دو گنا زیادہ ہدف رکھا گیا ہے۔ اس اندازے کے مطابق پیٹرولیم لیوی 50 روپے فی لیٹر سے 75 روپے فی لیٹر تک لے جانا پڑے گا۔
سابق وزیر خزانہ نے مزید کہا کہ اسحاق ڈار کو بجٹ کے آغاز میں اسٹریٹیجی یا کوئی پلان پیش کرنا چاہیے تھا۔ پاکستان کے زر مبادلہ ذخائر اس وقت 4 ارب ڈالر سے بھی نیچے چلے گئے ہیں۔
