کوئٹہ، وزیراعلیٰ بلوچستان سرفراز بگٹی نے کہا ہے کہ صوبے میں رواں سال کے دوران 500 سے زائد دہشتگرد مارے جا چکے ہیں، سیکیورٹی فورسز اور پولیس کے جوانوں نے بے مثال بہادری کا مظاہرہ کرتے ہوئے دہشتگردی کے ناسور کوجڑ سے اکھاڑنے میں اہم کردارادا کیا۔
وزیراعلیٰ نے کہا کہ پولیس کو جدید خطوط پراستوارکیا جا رہا ہے اس مقصد کے لیے وفاقی حکومت نے 10 ارب روپے دینے کا وعدہ کیا ہے۔
پاکستان نے امن کیلئے تمام راستے آزمائے، کابل نے مثبت جواب نہیں دیا، خواجہ آصف
سرفرازبگٹی کا کہنا تھا کہ پولیس کے نوجوانوں کو جدید کورسزاورآئی ٹی کی تعلیم فراہم کی جائے گی جبکہ ان کی تربیت پی ایم اے کی طرزپر کی جائے گی، پولیس کیلئے جدید ڈرونز حاصل کیے جا رہے ہیں تاکہ آپریشنز میں مؤثر نگرانی ممکن ہو سکے۔
انہوں نے کہا کہ تمام بھرتیاں میرٹ پر ہوں گی، پولیس کے معاملات میں کسی قسم کی سیاسی مداخلت برداشت نہیں کی جائے گی اور کرپشن کے خاتمے کیلئے سخت اقدامات کیے جا رہے ہیں۔
سرفرازبگٹی نے اعلان کیا کہ شہدا کے اہلخانہ کا مکمل خیال رکھنا ریاست کی ذمہ داری ہے، ان کے بچوں کے تعلیمی اخراجات حکومت برداشت کریگی، منشیات کے خاتمے کیلئے کوئٹہ میں بھرپورآپریشن شروع کیا جا رہا ہے۔
وزیراعلیٰ بلوچستان نے واضح کیا کہ ترقی اورخوشحالی کیلئے امن کا قیام اولین شرط ہے، پولیس اورسیکیورٹی فورسز کی قربانیاں رائیگاں نہیں جائیں گی۔
