لاہور: وزیر اعلیٰ پنجاب مریم نواز نے ریاست کے خلاف بندوق اٹھانے والے انتہا پسندوں، بدمعاشوں اور غیر قانونی رہائشیوں کے لیے پنجاب کی زمین مزید تنگ کرنے کا اعلان کر دیا۔
وزیر اعلیٰ پنجاب مریم نواز کی زیر صدارت امن و امان پر مسلسل تیسرا غیر معمولی اجلاس ہوا۔ جس میں پنجاب حکومت کی ریاستی رٹ اور قانون کی بالادستی قائم کرنے کے لیے غیرمعمولی فیصلے کیے گئے۔
صوبائی حکومت نے لاؤڈ اسپیکر ایکٹ کا نفاذ لازمی اور مزید سخت کرنے اور ہر ضلع میں وسل بلور سیل قائم کرنے کا فیصلہ کیا۔
انتہا پسند جماعت اور غیر قانونی رہائش پذیر غیر ملکی شہریوں کے خلاف پنجاب پولیس ہیلپ لائن 15 میں خصوصی سیل قائم کر دیا گیا۔ جہاں عوام انتہا پسند جماعت اور غیرقانونی تارکین وطن کی اطلاع فوری طور پر دے سکیں گے۔
پنجاب حکومت نے صوبے کو غیر قانونی اسلحہ سے پاک کرنے کے لیے اقدامات کی رفتار تیز اور مزید سخت کرنے کا فیصلہ کیا۔ جبکہ پنجاب میں ڈالا کلچر، بدماشی اور مافیا کلچر کو کسی صورت برداشت نہ کرنے کا فیصلہ کیا گیا۔
پنجاب حکومت نے انتہا پسند جتھوں کے اشتہارات، تصاویر اور پلے کارڈز پر سخت پابندی اور کارروائی کا بھی فیصلہ کیا۔
صوبہ کی تمام ضلعی انتظامیہ کو روزانہ غیرقانونی بین الاقوامی رہائشیوں کے خلاف کومبنگ آپریشن رپورٹس اپ ڈیٹ کرنے کا حکم دیا گیا۔ پنجاب حکومت نے عوام کو ہدایت کی کہ غیرقانونی رہائشیوں کو دکان یا مکان کرائے پر نہ دیں۔ ورنہ کرایہ داری اور پاسپورٹ ایکٹ کے تحت کارروائی ہو گی۔
یہ بھی پڑھیں: خواجہ سراؤں کے نام پر فراڈ، میڈیکل ٹیسٹ میں سب مرد نکلے
اجلاس میں فیصلہ کی گیا کہ سوشل میڈیا پر نفرت انگیز مواد پھیلانے والوں کے خلاف پیکا ایکٹ کے تحت مقدمات درج کیے جائیں گے۔
