اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے مون سون بارشوں کے نقصانات کی رپورٹ جاری کر دی۔
این ڈی ایم اے کی جاری کردہ رپورٹ کے مطابق مون سون بارشوں کے باعث ملک بھر میں 124 افراد جاں بحق جبکہ 264 زخمی ہوئے۔ پنجاب میں سب سے زیادہ 49 افراد جاں بحق اور 158 افراد زخمی ہوئے۔ جبکہ جاں بحق ہونے والوں میں 28 بچے بھی شامل ہیں۔
خیبرپختونخوا میں 38 اموات اور 57 افراد زخمی ہوئے۔ سندھ میں 20 افراد جاں بحق اور 40 زخمی ہوئے۔ جبکہ بلوچستان میں 16 اموات اور 4 افراد زخمی ہوئے۔
رپورٹ کے مطابق آزاد کشمیر میں ایک شخص جان کی بازی ہار گیا۔ بارشوں سے سب سے زیادہ اموات بچوں کی ہوئیں۔
یہ بھی پڑھیں: خیبر پختونخوا اسمبلی کی نئی پارٹی پوزیشن جاری
این ڈی ایم اے کی رپورٹ کے مطابق مون سون بارشوں سے مجموعی طور پر اب تک 522 گھروں کو نقصان پہنچا۔ اور 367 گھروں کو جزوی جبکہ 155 گھر مکمل تباہ ہو گئے۔
ملک بھر میں بارشوں کے باعث 9 پل بھی متاثر ہوئے۔ ساڑھے 10 کلومیٹر سڑکوں کو نقصان پہنچا۔ اور بارشوں میں 126 مویشی بھی بہہ گئے۔
