پانچ میچوں پر مشتمل ٹیسٹ سیریز کے تیسرے میچ میں انگلینڈ نے بھارت کو سنسنی خیز مقابلے کے بعد 22 رنز سے ہرادیا۔
لارڈز کے میدان میں کھیلے گئے میچ میں انگلینڈ نے بھارت کو جیت کے لیے 193 رنز کا ہدف دیا تھا تاہم بھارتی ٹیم اپنی دوسری اننگز میں 170رنز بناکر آؤٹ ہوگئی۔
آل راؤنڈر رویندرا جڈیجا نے کافی مزاحمت کی مگر وہ بھارت کو شکست سے نہ بچاسکے، اُنہوں نے 61 رنز کی ناقابل شکست اننگز کھیلی۔
کے ایل راہول نے 39 رنز بنائے، اُن کے علاوہ کوئی اور بیٹر انگلش بولرز کے سامنے نہ ٹک سکا، بھارت کی دوسری اننگز میں انگلش کپتان بین اسٹوکس نے 48 اور جوفرا آرچر نے 55 رنز کے عوض تین، تین وکٹیں حاصل کیں۔
جو روٹ نے ٹیسٹ کرکٹ میں نیا ورلڈ ریکارڈ قائم کر دیا
برائیڈن کارز نے دو کھلاڑیوں کو آؤٹ کیا، میچ میں انگلینڈ نے پہلی اننگز میں 387 جبکہ بھارت نے بھی پہلی اننگز میں 387 رنز اسکور کیے تھے۔
دوسری اننگز میں انگلینڈ کی ٹیم 192رنز بناکر آؤٹ ہوئی، پانچ ٹیسٹ پر مشتمل سیریز میں انگلینڈ کو دو ایک کی برتری حاصل ہوگئی ہے۔
انگلینڈ نے لیڈز ٹیسٹ میں پانچ وکٹ سے فتح حاصل کی تھی، بھارت نے برمنگھم ٹیسٹ میں میزبان ملک کو 336 رنز کے مارجن سے ہرایا تھا۔
