اسلام آباد: آرمی چیف جنرل عاصم منیر نے کہا ہے کہ سیکیورٹی اداروں میں بغاوت کو ہوا دینے والا پاکستان دشمن ہے۔
آرمی چیف جنرل سید عاصم منیر نے اوورسیز پاکستانیز کنونشن سے خطاب کرتے ہوئے کہا کہ آپ صرف پاکستان کے سفیر ہی نہیں بلکہ وہ روشنی ہیں جو اقوام عالم کو روشن کرتی ہے۔ اور برین ڈرین کا بیانیہ بنانے والے جان لیں کہ یہ برین ڈرین نہیں بلکہ برین گین ہے۔
انہوں نے کہا کہ جب تک عوام فوج کے ساتھ کھڑے ہیں۔ کوئی پاکستان کو نقصان نہیں پہنچا سکتا۔ اور پاکستان کے سیکیورٹی اداروں میں جو بغاوت کو ہوا دیتا ہے وہ پاکستان کا دشمن ہے۔
جنرل سید عاصم منیر نے کہا کہ مٹھی بھر دہشت گرد پاکستان کو روشن مستقبل کی جانب بڑھنے سے نہیں روک سکتے۔ جبکہ دہشت گردوں کی 10 نسلیں بھی بلوچستان اور پاکستان کا کچھ نہیں بگاڑ سکتیں۔ بلوچستان پاکستان کی تقدیر اور ہمارے ماتھے کا جھومر ہے۔
انہوں نے کہا کہ جس ملک کے تمام ادارے آئین کے مطابق کام کریں ایسی ریاست کو ہارڈ اسٹیٹ کہا جاتا ہے۔ پاکستانی قوم اپنے شہداء کو نہایت عزت اور وقار کی نگاہ سے دیکھتی ہے۔ جبکہ کشمیر پاکستان کی شہ رگ تھا، ہے اور ہمیشہ رہے گا۔
یہ بھی پڑھیں: مہنگائی کا جن بوتل سے نکل جائے تو بند نہیں کیا جا سکتا، وزیر اعلیٰ پنجاب
آرمی چیف نے کہا کہ پاکستانیوں کا دل ہمیشہ غزہ کے مسلمانوں کے ساتھ دھڑکتا ہے۔ ہمیں امید نہیں چھوڑنی اور مایوس نہیں ہونا۔ چاہتا ہوں اوورسیز پاکستانی دنیا میں پاکستان کی نمائندگی فخر کیساتھ کریں۔
