پاکستان اور افغانستان کے درمیان سرحدی کشیدگی اور امریکا و اسرائیل کی ایران کے ساتھ جنگ کے بعد خطے کی صورتحال پر وزیراعظم ہاؤس میں سیاسی جماعتوں اور اراکین پارلیمنٹ کو ان کیمرہ بریفنگ دی گئی۔
ذرائع کے مطابق ان کیمرا بریفنگ میں پیپلز پارٹی، جے یو آئی ف، متحدہ قومی موومنٹ پاکستان اور بلوچستان عوامی پارٹی کے اراکین بریفنگ میں شریک ہوئے۔ اپوزیشن جماعت تحریک انصاف کا کوئی رکن شریک نہیں ہوا۔
خطے کی کشیدہ صورتحال ، وزیراعظم شہباز شریف کا دورہ روس ملتوی
ذرائع کا کہنا ہے کہ سیاسی جماعتوں کے سربراہان اور پارلیمانی لیڈرز کو سکیورٹی صورتحال پر بریفنگ دی گئی ،وزیراعظم شہباز شریف نے مشرق وسطیٰ کی قیادت سے رابطوں پر بھی اعتماد میں لیا۔
ذرائع نے بتایا کہ وزارت خارجہ حکام نے مشرق وسطیٰ کی صورتحال پر پاکستان کے مؤقف پر بریفنگ دیتے ہوئے کہا کہ پاکستان نے تنازع کی شدت میں کمی لانے کیلئے ہر ممکن کوشش کی، جبکہ اسحاق ڈار نے خلیجی اور عرب ممالک کے ساتھ اپنے دوطرفہ رابطوں سے متعلق آگاہ کیا۔
