لاہور کے تاریخی گریٹر اقبال پارک میں شہریوں، خصوصاً بچوں اور فیملیز کیلئے تفریح کا ایک اور بڑا منصوبہ مکمل کرلیا گیا۔
وزیر ہاؤسنگ پنجاب بلال یاسین نے 2 ایکڑ پرمحیط جدید پلے لینڈ کا باقاعدہ افتتاح کردیا۔ افتتاحی تقریب کے موقع پر انہیں منصوبے کی تفصیلی بریفنگ دی گئی جس میں بتایا گیا کہ یہ پلے لینڈ عالمی معیار کو مدنظر رکھتے ہوئے ڈزنی لینڈ کی طرز پر تعمیر کیا گیا ہے۔
وزیر ہاؤسنگ پنجاب بلال یاسین نے اس موقع پر کہا کہ پارکس میں بچوں اور فیملیز کیلئے منفرد اور محفوظ تفریحی سہولیات بے حد ضروری ہیں۔
ان کا کہنا تھا کہ قدرتی ماحول میں تفریح کے مواقع نہ صرف صحت مند سرگرمیوں کے فروغ میں مددگار ثابت ہوں گے بلکہ خاندانی تفریح کو بھی فروغ دیں گے۔
بسنت کے موقع پر پبلک ٹرانسپورٹ فری، اورنج لائن ٹرین کے بارے فیصلہ نہ ہو سکا
بریفنگ میں بتایا گیا کہ پلے لینڈ میں موشن رائیڈ سمیت سفاری موٹر بائیک، بریک ڈانس، میری گولڈ رائیڈ، پیرائٹ شپ اور دیگر جدید جھولے نصب کئے گئے ہیں جو بچوں اور بڑوں دونوں کیلئے دلچسپی کا باعث ہوں گے۔
منصوبے میں سکیورٹی اور معیار کو خصوصی اہمیت دی گئی ہے اورتمام جھولوں کے فٹنس سرٹیفکیٹ یونیورسٹی آف انجینئرنگ اینڈ ٹیکنالوجی (یو ای ٹی) سے حاصل کیے گئے ہیں۔
وزیر ہاؤسنگ نے ہدایات جاری کیں کہ لاہورسمیت صوبے کے تمام پارکس میں فٹنس سرٹیفکیٹس اورایس او پیز پر سختی سے عملدرآمد یقینی بنایا جائے تاکہ شہری بلا خوف و خطرتفریح سے لطف اندوز ہوسکیں، حکومت عوامی مقامات کو مزید بہتر اور محفوظ بنانے کیلئے اقدامات جاری رکھے گی۔
