پاکستان ٹیلی کمیونیکیشن اتھارٹی (پی ٹی اے) نے ورچوئل پرائیویٹ نیٹ ورک (وی پی این) سروس فراہم کرنے والی کمپنیوں کو لائسنسنگ کا باضابطہ آغاز کر دیا ہے۔
اتھارٹی کی جانب سے جاری بیان کے مطابق یہ اقدام کمرشل کلاؤڈ وی پی این سروسز (CVAS-Data) کے تحت کیا گیا ہے، جس کا مقصد ملک میں محفوظ، بااعتماد اور قانونی وی پی این خدمات کو یقینی بنانا ہے۔
بیان میں کہا گیا ہے کہ 6 کمپنیوں کو وی پی این لائسنس جاری کیے جا چکے ہیں، جن میںAlpha 3 Cubic (Steer Lucid)، Zettabyte (Crest VPN)، Nexilium Tech (Kestrel VPN)، UKI Conic Solutions (QuiXure VPN)، اور Vision Tech 360 (Kryptonyme VPN) شامل ہیں۔
ان کمپنیوں کو ملکی قوانین اور پالیسی مقاصد کے مطابق وی پی این سروس فراہم کرنے کی اجازت دی گئی ہے۔
پی ٹی اے کا کہنا ہے کہ لائسنس یافتہ وی پی این سروسز کا مقصد انٹرنیٹ صارفین کو محفوظ، قانونی اور باقاعدہ ڈیجیٹل سہولیات فراہم کرنا ہے تاکہ غیر قانونی سروسز کے استعمال کو روکا جا سکے اور ملک میں ڈیجیٹل ایكو سسٹم کو بہتر بنایا جا سکے۔
اتھارٹی کے مطابق صارفین اب انٹرنیٹ براوزنگ، موبائل بینکنگ، ریموٹ ورک اور دیگر خدمات کیلئے پی ٹی اے کی منظور شدہ وی پی این کمپنیوں کی خدمات قانونی طور پر حاصل کر سکیں گے۔
پی ٹی اے کا کہنا ہے کہ اس اقدام سے سائبر سیکیورٹی میں بہتری، ڈیجیٹل ٹیکنالوجی کی شفافیت اور ڈیٹا کے تحفظ کو یقینی بنانے میں مدد ملے گی۔
