وزیر قانون اعظم نذیر تارڑ نے میڈیا کو بتایا ہے کہ وفاقی کابینہ نے 27 ویں آئینی ترمیم کی منظوری دے دی ہے۔
کابینہ کے اجلاس کے بعد میڈیا کو بریفنگ دیتے ہوئے انہوں نے کہا کہ آئینی عدالت کے قیام پر بھی اتفاق ہو گیا ہے۔
وزیر قانون نے بتایا کہ آج حکومت کی جانب سے 27ویں آئینی ترمیم کا بل سینیٹ میں پیش کیا جائیگا۔
اس کے بعد اس بل کو ممکنہ طور پر مشترکہ پارلیمانی کمیٹی کے سپرد کیا جائیگا تاکہ بل کی شقوں پر تفصیل بحث ہو سکے۔ اس مرحلے سے گزرنے کے بعد ترمیمی بل کو قومی اسمبلی میں منظوری کے لیے پیش کیا جائیگا۔
وزیراعظم شہباز شریف نے آذربائیجان کے شہر باکو سے ویڈیو لنک کے ذریعے کابینہ اجلاس کی صدارت کی۔ ذرائع کے مطابق انہوں نے اس ترمیم کو نہایت اہم قرار دیتے ہوئے اس کی جلد از جلد منظوری کے لیے دیگر جماعتوں سے بات چیت کرنے کی ہدایت کی۔
اجلاس میں وزیر دفاع خواجہ آصف، مصدق ملک، رانا ثنا اللہ، ریاض حسین پیرزادہ، عون چوہدری، شزرہ منصب اور قیصر احمد شیخ شریک ہیں۔ اجلاس میں وزیر قانون اور اٹارنی جنرل منصور عثمان اعوان بھی موجود تھے۔
اعظم نذیر تارڑ نے مزید بتایا حکومت 27 ویں آئینی ترمیم کے بل کی منظوری کے لیے حلیف جماعتوں کے ساتھ اشتراک کرے گی۔
اس کے علاوہ انہوں نے کہا کہ اجلاس میں آئینی عدالت کے قیام پر اتفاق رائے کیا گیا اور ججز کے ٹرانسفر کو جوڈیشل کمیشن کے سُپرد کرنے کی تجویز پیش کی گئی۔ ہائی کورٹ کے چیف جسٹس بھی ٹرانسفر کے عمل کا حصہ ہوں گے۔
وفاقی وزیر قانون نے کہا کہ آرٹیکل 243 سے متعلق ماضی میں سبق حاصل کیا گیا ہے اور پورے ملک میں ایک وقت میں سینیٹ کے انتخابات کی تجویز دی گئی۔ انہوں نے کہا کہ ہر 3 سال بعد سینیٹ کے چیئرمین اور ڈپٹی چیئرمین کا انتخاب آئینی ضرورت ہے۔
اجلاس میں مشورہ دیا گیا کہ پہلے 5 ایڈوائزرز کی اجازت تھی، جسے 7 کرنے کی تجویز دی گئی ہے۔
قومی ہیروز کے اعزازات تاحیات ہونے یا نہ ہونے کے حوالے سے بھی غور کیا گیا۔ اور کچھ عہدے اور اعزازات جو آرمی ایکٹ میں شامل تھے لیکن آئین میں ان کا ذکر نہیں تھا، جیسے فیلڈ مارشل اور پاک بحریہ اور پاک فضائیہ کے اعزازات، ان پر بھی بات چیت ہوئی ہے۔
اعظم نذیر تارڑ نے کہا کہ آئینی ترمیم دو تہائی اکثریت سے منظور ہونے پر آئین کا حصہ بنے گی اور سیاسی استحکام و ہم آہنگی ملک کی سب سے بڑی ضرورت ہے۔
دوسری جانب ذرائع کا کہنا ہے کہ آج سینیٹ کا اجلاس بھی ہوگا جو اتوار تک جاری رہ سکتا ہے اور اس دوران آئینی ترمیم پر تفصیلی بحث کی جائے گی۔ امکان ہے کہ سینیٹ پیر کو اس ترمیم کی منظوری دے دے۔ ذرائع کے مطابق اپوزیشن جماعتیں آئینی ترمیم پیش کیے جانے پر احتجاج کر سکتی ہیں۔
