اسلام آباد یونائیٹڈ کے نیٹ سیشن میں حادثہ، کھلاڑی سر پر گیند لگنے سے زخمی

کراچی میں اسلام آباد یونائیٹڈ کے نیٹ پریکٹس سیشن کے دوران ایک افسوسناک واقعہ پیش آیا جب بولنگ کے دوران تیز رفتار گیند کھلاڑی میر حمزہ سجاد کے سر پر لگ گئی، جس کے باعث وہ میدان میں ہی بے ہوش ہوگئے۔

واقعے کے فوراً بعد ٹیم مینجمنٹ اور ساتھی کھلاڑیوں میں تشویش کی لہر دوڑ گئی اور پریکٹس سیشن کو فوری طور پر معطل کردیا گیا۔

ٹیم ترجمان کے مطابق زخمی کھلاڑی کو فوری طور پر قریبی نجی اسپتال منتقل کیا گیا جہاں ڈاکٹرز نے ان کا معائنہ کیا اور ضروری طبی امداد فراہم کی۔

پاکستانی باکسر سمیر خان نے بھارت کو محبت کا سبق سکھا دیا

اسلام آباد یونائیٹڈ کی جانب سے جاری بیان میں بتایا گیا کہ حادثہ نیٹ سیشن کے دوران پیش آیا، تاہم بروقت طبی امداد کے باعث کھلاڑی کو ہوش آ گیا ہے اور ان کی حالت اب پہلے سے بہتر ہے۔

ٹیم انتظامیہ نے مداحوں کو یقین دہانی کرائی ہے کہ میر حمزہ سجاد کی صحت پر مسلسل نظر رکھی جا رہی ہے اور ماہر ڈاکٹروں کی نگرانی میں ان کا علاج جاری ہے۔

حادثے کے بعد اسلام آباد یونائیٹڈ کے کیمپ میں فکرمندی کا ماحول رہا، جبکہ کھلاڑیوں اور آفیشلز نے میر حمزہ سجاد کی جلد اور مکمل صحتیابی کے لیے نیک خواہشات کا اظہار کیا ہے۔