پاکستان ہمیشہ سعودی عرب کیساتھ شانہ بشانہ کھڑا رہیگا، وزیراعظم کی محمد بن سلمان کو یقین دہانی

وزیراعظم شہباز شریف اور سعودی ولی عہد محمد بن سلمان نے حالیہ اہم رابطے میں خطے میں جاری کشیدگی پر تفصیلی تبادلہ خیال کیا۔

ملاقات کے دوران وزیراعظم نے سعودی عرب کے ساتھ پاکستان کی یکجہتی اور حمایت کا اظہار کیا اور کہا کہ پاکستان کی حکومت اور عوام ہمیشہ سعودی عرب کے شانہ بشانہ کھڑے ہیں۔

وزیراعظم نے سعودی قیادت کی ہر مشکل وقت میں پاکستان کے ساتھ تعاون اور کشیدگی کے دوران ان کے تحمل اور دانشمندی کے مظاہرے کو سراہا۔

سعودی عرب پر ایرانی حملے غیر ضروری ہیں جو کشیدگی بڑھا رہے ہیں،کور کمانڈر کانفرنس

انہوں نے مزید کہا کہ پاکستان دیگر ممالک کے ساتھ مل کر خطے میں امن کے قیام اور جاری کشیدگی کو کم کرنے کے لیے اپنا کردار ادا کر رہا ہے اوراس سلسلے میں پاکستان کی سفارتی کاوشوں سے سعودی ولی عہد کو آگاہ کیا۔

وزیراعظم نے خادم الحرمین الشریفین شاہ سلمان بن عبدالعزیز آل سعود کے لئے نیک تمناؤں کا بھی اظہار کیا۔ سعودی ولی عہد نے اس موقع پر پاکستان کی خطے میں امن و استحکام کیلئے کوششوں کو سراہا اور تعاون جاری رکھنے پر زور دیا۔

رہنماؤں کے درمیان یہ رابطہ نہ صرف پاکستان اور سعودی عرب کے دیرینہ برادرانہ تعلقات کو مزید مستحکم کرنے کی نشاندہی کرتا ہے بلکہ خطے میں امن و استحکام کے لیے دونوں ممالک کی مشترکہ کاوشوں کی بھی عکاسی کرتا ہے۔