کراچی کنگز کے کپتان ڈیوڈ وارنر نشے میں دھت ہو کر ڈرائیونگ کرنیکے الزام گرفتار

آسٹریلوی کرکٹ اسٹار اور پاکستان سپر لیگ میں کراچی کنگز کے کپتان ڈیوڈ وارنر کو شراب پی کر ڈرائیونگ کرنے کے الزام میں گرفتار کر لیا گیا ہے۔

آسٹریلوی میڈیا کے مطابق یہ واقعہ سڈنی کے علاقے ماروبرا میں پیش آیا جہاں پولیس نے مشکوک ڈرائیونگ پر ڈیوڈ وارنر کی گاڑی کو روکنے کی کوشش کی۔

رپورٹس کے مطابق وارنر نے پولیس کے ٹیسٹنگ سینٹر سے کچھ فاصلہ پہلے ہی گاڑی روک دی تھی، تاہم پولیس اہلکاروں نے موقع پر پہنچ کر ان کا بریتھ ٹیسٹ لیا۔ ٹیسٹ مثبت آنے پر نیو ساؤتھ ویلز پولیس نے ضابطے کی کارروائی کرتے ہوئے انہیں گرفتار کر کے پولیس اسٹیشن منتقل کر دیا اور ان کے خلاف مقدمہ درج کر لیا گیا ہے۔

پولیس کی جانب سے ڈیوڈ وارنر کو 7 مئی کو عدالت میں پیش ہونے کا حکم دیا گیا ہے۔

واضح رہے کہ ڈیوڈ وارنر ان دنوں پاکستان سپر لیگ (پی ایس ایل) کے سلسلے میں کراچی کنگز کی قیادت کر رہے ہیں۔

وہ لیگ کے دوران ہی چند روز کی چھٹی لے کر آسٹریلیا روانہ ہوئے تھے اور شیڈول کے مطابق انہیں 9 اپریل کو دوبارہ اپنی ٹیم کو جوائن کرنا تھا، تاہم اس قانونی کارروائی کے بعد اب ان کی واپسی کے حوالے سے غیریقینی صورتحال پیدا ہو گئی ہے۔