معروف نعت خواں تابندہ لاری انتقال کر گئیں

کراچی: ملک کی معروف نعت خواں تابندہ لاری انتقال کر گئیں۔

اہلخانہ کے مطابق تابندہ لاری گزشتہ چند روز سے عارضہ قلب میں مبتلا تھیں۔ اور وہ قومی ادارہ امراضِ قلب میں زیرعلاج تھیں۔ جہاں وہ خالق حقیقی سے جا ملیں۔

خاندانی ذرائع نے بتایا کہ مرحومہ کی نماز جنازہ آج بعد از نمازعشاء مسجد فاروق اعظم، نارتھ ناظم آباد میں ادا کی جائے گی۔ جس میں اہلخانہ، عزیز و اقارب اور عقیدت مندوں کی بڑی تعداد شریک ہو گی۔

تابندہ لاری کا شمار ملک کی معروف نعت خواں میں ہوتا تھا۔ اور انہوں نے اپنی خوبصورت آواز کے ذریعے مدحت رسولﷺ میں نمایاں خدمات انجام دیں۔ ان کے انتقال پر مذہبی و سماجی حلقوں کی جانب سے گہرے دکھ اور افسوس کا اظہار کیا جا رہا ہے۔

تابندہ لاری نے اپنی پرسوز آواز اور عقیدت سے بھرپور کلام کے ذریعے نعت خوانی کی دنیا میں نمایاں مقام حاصل کیا۔ ان کی وفات کو مداح ایک بڑا نقصان قرار دے رہے ہیں اور سوشل میڈیا پر ان کے لیے دعاؤں اور تعزیتی پیغامات کا سلسلہ جاری ہے۔

یہ بھی پڑھیں: سماجی انصاف، معاشی شمولیت اور بین المذاہب ہم آہنگی ہی پائیدار امن کی بنیاد ہیں، وزیراعظم

ان کی خدمات کو ہمیشہ یاد رکھا جائے گا اور نعت خوانی کے میدان میں ان کی آواز دیر تک گونجتی رہے گی۔