خیبر پختونخوا اسمبلی سے بل منظور، موٹر سائیکل و رکشہ مالکان کیلئے بڑا ریلیف

پشاور، خیبر پختونخوا اسمبلی نے موٹر وہیکل رجسٹریشن سے متعلق ترمیمی بل کثرت رائے سے منظور کر لیا، جس کے تحت موٹر سائیکل اور رکشہ مالکان کو ایک ماہ کیلئے نمایاں مالی ریلیف فراہم کیا گیا ہے۔

حکومتی رکن داود شاہ کی جانب سے پیش کیے گئے پرائیویٹ ممبر بل میں مختلف فیسوں کے خاتمے کی منظوری دی گئی۔

ترمیمی قانون کے مطابق موٹرسائیکل اوررکشہ کی ٹرانسفرفیس ایک ماہ کیلئے مکمل طورپرختم کردی گئی ہے، جس کے تحت موٹرسائیکل کی 500 روپے اوررکشہ کی 800 روپے فیس معاف ہوگی، اس کے علاوہ نمبر پلیٹ اوراسمارٹ کارڈ کی فیس بھی عارضی طور پرختم کرنے کا فیصلہ کیا گیا ہے۔

خیبرپختونخوا میں کاروباری اوقات کار محدود، نئی پابندیاں نافذ

بل میں مزید کہا گیا ہے کہ موٹرسائیکل کی 2300 روپے پی آرایم فیس اوررکشہ رجسٹریشن کیلئے مقررہ 2600 روپے کی فیس بھی وصول نہیں کی جائیگی، اس اقدام سے شہریوں کو خاطرخواہ مالی سہولت میسرآئیگی اوررجسٹریشن کا عمل آسان اور سستا ہوجائیگا۔

حکومت کا کہنا ہے کہ یہ استثنیٰ عوام کو ریلیف دینے کے لئے دیا گیا ہے جبکہ محکمہ ایکسائز کو ہدایت کی گئی ہے کہ وہ ترمیمی قانون کے تحت نئی فیسوں کے شیڈول پرفوری عملدرآمد یقینی بنائے۔

نئی ترامیم کے بعد توقع ہے کہ بڑی تعداد میں شہری اپنی گاڑیوں کی رجسٹریشن اور ٹرانسفرکا عمل مکمل کریں گے۔