ایرانی وزیر خارجہ نے اسلام آباد مذاکرات سے انکار کی خبروں کی تردید کر دی

تہران: ایران نے پاکستان کی کوششوں کو سراہتے ہوئے اسلام آباد مذاکرات سے انکار کی خبروں کی تردید کر دی۔

ایرانی وزیر خارجہ عباس عراقچی نے اپنے ایک بیان میں واضح کیا کہ ایران نے اسلام آباد میں ثالثی مذاکرات کے لیے جانے سے کبھی انکار نہیں کیا۔ اور وہ دیرپا امن کے لیے سنجیدہ کوششیں جاری رکھے ہوئے ہے۔

انہوں نے کہا کہ ایران پر مسلط کردہ غیر قانونی جنگ کے خاتمے کے لیے پائیدار امن کی شرائط پر توجہ دی جا رہی ہے۔ جبکہ امریکی میڈیا ایران کے مؤقف کو غلط انداز میں پیش کر رہا ہے۔

عباس عراقچی نے پاکستان کی سفارتی کوششوں کو سراہتے ہوئے کہا کہ ایران پاکستان کا تہہ دل سے شکر گزار ہے۔ اور اپنے سوشل میڈیا اکاؤنٹ پر “پاکستان زندہ باد” بھی تحریر کیا۔ عباس عراقچی نے تہران میں ایک ریلی کے دوران پاکستانی پرچم لہرانے کی ویڈیو بھی شیئر کی۔

ایرانی وزیر خارجہ نے مزید کہا کہ عالمی برادری کو یوکرین میں نیوکلیئر پاور پلانٹس کے قریب حملوں پر مغربی ردعمل یاد رکھنا چاہیے۔ جبکہ ان کے بقول امریکا اور اسرائیل بوشہر پاور پلانٹ کو نشانہ بنا چکے ہیں۔

انہوں نے خبردار کیا کہ تابکاری کے اثرات خلیجی ممالک کے لیے تباہ کن ثابت ہو سکتے ہیں۔

انہوں نے الزام عائد کیا کہ ایران کی پیٹروکیمیکل تنصیبات پر حملے امریکا کے اصل مقاصد کو ظاہر کرتے ہیں۔ جبکہ خطے میں کشیدگی کے خاتمے کے لیے سنجیدہ اور منصفانہ اقدامات ناگزیر ہیں۔

یہ بھی پڑھیں: ریاض میں امریکی سفارتخانے پر ڈرون حملہ اسرائیل نے کیا؟ پاسداران انقلاب

دوسری جانب وزیر خارجہ اسحاق ڈار نے ایرانی ہم منصب کے بیان پر ردعمل دیتے ہوئے ان کا شکریہ ادا کیا اور انہیں “میرے عزیز بھائی” قرار دیا۔